තැපෑලේ අපලය දුරු කරගමු
තැපැල් වර්ජනය අපලයක් බවට පත්වෙමින් ආණ්ඩුවට ප්‍රශ්න ඇතිකරමින් තිබේ. ඇඟිලි සලකුණු සහ අතිකාල දීමනා ඉල්ලීම් දෙක අතහැර එන්නේ නම් ඉල්ලීම් ගැන සාකච්ඡා කිරීමට සූදානම් බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස පාර්ලිමේන්තුවේදී පසුගිය බ්‍රහස්පතින්දා (21) ප්‍රකාශ කර තිබිණි. තැපැල් දෙපාර්තමේන්තුවට අතිකාල දීමනා ලොකුවටම වැඩිකර තිබියදී තව සතයක්වත් වැඩි කළ නොහැකි බවද ඔහුගේ ප්‍රකාශයේ සඳහන් විය.
අමාත්‍යවරයා එසේ ප්‍රකාශ කළද තැපැල් වෘත්තීය සමිති පෙරමුණේ සම කැඳවුම්කරු චින්තක බණ්ඩාර එයට ප්‍රතිචාර දක්වා තිබුණේ වර්ජනය අත්හිටුවා සාකච්ඡා කිරීමට තම සමිති සූදානම් නැති බවයි. දැන් මෙය ආණ්ඩුවත් තැපැල් වෘත්තීය සමිතිත් අතර කැත්තට පොල්ල තත්ත්වයක් නිර්මාණය කර තිබේ. බැලූ බැල්මට වෘත්තීය සමිති තම ඉල්ලීම් දිනාගන්නා තුරු සටන අත්හැරීමට සූදානමක් නැත. ආණ්ඩුව මුල සිටම තැපැල් වර්ජනය සම්බන්ධයෙන් දැක්වූයේ දැඩි ස්ථාවරයකි. ඇඟිලි සලකුණු තැබිය යුතු බවටත්, අතිකාල දීමනා තවදුරටත් වැඩි නොකිරීමටත් ගෙන ඇති තීන්දු වෙනස් නොකරන බව රජය දැඩිව කියා සිටී.
ආණ්ඩුවත් තැපැල් සමිතිත් අතර ඇතිව තිබෙන මේ ගැටලුව හේතුවෙන් රටේ තැපැල් රාජකාරි ඇනහිට තිබේ. චින්තක බණ්ඩාර මහතා ප්‍රකාශ කර ඇත්තේ තම වැඩවර්ජනය හේතුවෙන් ලිපි සහ පාර්සල් ඇතුළු තැපැල් භාණ්ඩ ලක්ෂ 17කට අධික ප්‍රමාණයක් බ්‍රහස්පතින්දා දහවල් වනවිට ගොඩගැසී තිබුණු බවය. එයට අමතරව විදෙස් තැපැල් මලු ලක්ෂයකට අධික ප්‍රමාණයක් ගොඩගැසී ඇති බවත් කියා තිබිණි.
ඔහු මේ ගණන් හිලව් දක්වන්නේ තම වැඩවර්ජනයේ සාර්ථකත්වය රටට පෙන්වීම සඳහා බව පැහැදිලිය. තැපෑලේ ලොක්කන් කියන්නේ මේ ගණන් හිලව් නිවැරදි නොවන බවය. මේ දෙකින් හරි ඇත්ත කුමක්දැයි අපි නොදනිමු. නමුත් වැඩවර්ජනය හේතුවෙන් ලක්ෂ ගණනින් ලිපි, පාර්සල් භාණ්ඩ සහ විදෙස් තැපැල් පාර්සල් හා භාණ්ඩද ගොඩගැසී ඇති බව පැවසීම බොරුවක් නොවේ. මේ ප්‍රමාද වෙන්නේ ජනතාවට ලැබිය යුතු සේවාවයි. මේ ලිපි සහ පාර්සල්ද භාණ්ඩද අතර වැඩි දිනක් ප්‍රමාද වුවහොත් ඉවත දැමීමට සිදුවන ඒවාද තිබෙන බව නිසැකය. ඒවායේ පාඩුව විඳ දරාගත යුත්තේ මහජනතාවයි.
තැපෑල ද රජයේ සේවාවක් බැවින් රජය මගින් රාජ්‍ය සේවකයන්ට ලබාදුන් වැටුප් වැඩිවීම තැපැල් සේවකයන්ටද ලැබී තිබේ. ඒ අනුව ඔවුන්ගේ අතිකාල දීමනා වැඩි කළ යුතු බව පවසන්නේ කුමන හේතුවක් නිසාද? ඒ සමඟ සිදුකරන පැමිණීම සහ පිටවීම සටහන් කරන ඇඟිලි සලකුණු යන්ත්‍ර භාවිතය ප්‍රතික්ෂේප කිරීම අතිකාල දීමනා අසාධාරණ ලෙස වැඩිකර ගැනීමට යොදවා ගන්නා උපක්‍රමයක් නොවන බවට දිය හැකි සහතිකය කුමක්ද? තැපැල් වෘත්තීය සමිති මේ ගැටලු දෙකටම පැහැදිලි පිළිතුරක් ලබාදීමට පැකිළෙන බවද පෙනෙන්නට තිබේ. මේ හේතුව නිසාම තැපැල් වැඩවර්ජනයට මහජනතාවගේ විශ්වාසය දිනාගැනීම ඉතා අපහසු බව වෘත්තීය සමිති තේරුම්ගත යුතුය.
එපමණක් නොව මෙරට තැපෑල තවමත් පවතින්නේ පැරණි පන්නයට බව උප තැපැල් කන්තෝරුවකට ගොඩවෙන ඕනෑම කෙනකුට පහසුවෙන් වටහාගත හැක. වෘත්තීය සමිති සටන් කළ යුත්තේ තම වෘත්තීය අයිතිවාසිකම් දිනාගැනීම සඳහා පමණක් නොවේ. තමන් නිරතව සිටින සේවාවේ ගුණාත්මක වර්ධනයක් ලබාගැනීමද ඔවුන්ගේ ඉල්ලීම් අතර තිබිය යුතුය. තැපැල් කටයුතු සම්බන්ධව නවීන තාක්ෂණයද ඍජුවම සම්බන්ධ වන බැවින් එම තාක්ෂණය තැපැල් සේවාවේ අභිවෘද්ධියට යොදාගැනීමේ අභියෝගයද වෘත්තීය සමිති භාරගත යුතුය.
ඔවුන් රජයට ඒ සඳහා බල කළ යුතු වුවද ඒ වෙනුවට සිදුවෙමින් තිබෙන්නේ පැරණි ක්‍රම ආරක්ෂා කරගෙන යාමට විශාල සේවක පිරිසක් සිටිය යුතු බවට වන තර්කය ඉදිරියට දැමීමය. සේවක පුරප්පාඩු පිරවීමට කිසිදු රජයක් ක්‍රියා නොකරන බව දන්නා නිසාම ඊළඟට ඔවුන් කරන්නේ වැඩ අධික බව පෙන්වමින් හැකි තරම් අතිකාල දීමනා වැඩිකර ගැනීමට ක්‍රියා කිරීමයි. මෙය තැපැල් සේවාවේ වර්ධනයට කෙසේ වෙතත් එය වළපල්ලට ගෙන යාමට පාර කපා ගැනීමක් බව ඔවුන් අනාගතයේදී හෝ තේරුම්ගනු ඇත. රජය සමඟ ගැටුමකට යාමට වඩා නම්‍යශීලී වෙමින් මේ වැඩවර්ජනය හැකි තරම් ඉක්මනින් අවසන් කිරීමට තැපැල් සමිති පියවර ගත යුතු අතර ඔවුන්ගේ සාධාරණ ඉල්ලීම්වලට පිළිතුරු ලබාදීමට රජය ද පියවර ගත යුතුය.