ඒක මාරයි.... දැන් මම ධර්ම යුද්ධයට ලෑස්තියි - Aruna Jayawardana
සිනමා අධ්‍යක්ෂවරයෙක් කියන්නේ කවුද?
අධ්‍යක්ෂවරයෙක් කියන්නේ නැවක කපිතාන් කෙනෙක් වගේ. නැව තමන්ගේ කාර්ය මණ්ඩලයත් එක්ක මහ මුහුදේ ආරක්ෂිතව ගමනාන්තය දක්වා ගමන් කරවනවා වගේ තමයි අධ්‍යක්ෂවරයකුගේ භූමිකාවත්. තමන්ගේ කණ්ඩායමේ ඉන්න සියලු දෙනාගේම සහයෝගය ඇතිව, හැමදෙයක්ම කළමනාකරණය කරගෙන, නිර්මාණශීලිත්වය උපරිම තලයේ තබාගෙන පරිස්සමට යන ගමනක් තමයි අධ්‍යක්ෂවරයකුගේ භූමිකාව වෙන්නේ.
අධ්‍යක්ෂවරු ගත්තාම එක එක්කෙනාට ආවේණික ශෛලීන් සහ එයාලා ඒක හසුරුවන විධි තියෙනවා. එකම චිත්‍රපටය අධ්‍යක්ෂකවරු තුන්දෙනකුට බාර දුන්නොත් ඒක කෙරෙන්නේ තුන් විදිහකට. අධ්‍යක්ෂවරයා මෙහෙම විය යුතුයි කියලා රාමුවකට අරන් පෙන්වන්න බැහැ. තමන් ගොඩනගාගත් හැකියාව, ඉගෙන ගත්ත දේවල්, සමාජ ගැන තියෙන අවබෝධය, මානව සම්බන්ධතා, ලෝකය ගැන ඔහුගේ කියවීම වගේ දේවල් එක්ක තමන් හදාගත්ත රාමුව ඇතුළේ තමයි අධ්‍යක්ෂවරයාගේ නිර්මාණය එළියට එන්නේ.
වැඩසටහන් සහ සිනමා අධ්‍යක්ෂවරයෙක් විදිහට ඔබ ආ ගමන් මඟ ගැන මතක සටහනක් තබමු?
මම තරුණසේවා සභාවේ රූපවාහිනි වැඩසටහන්කරණය සම්බන්ධ වෘත්තීය පුහුණු පාඨමාලාවක් හැදෑරුවා. ඒ ඔස්සේ මට රූපවාහිනි නාලිකා දෙකක රූපවාහිනි වැඩසටහන් නිෂ්පාදකවරයෙක් සහ වැඩසටහන් කළමනාකරුවෙක් විදිහට වැඩ කරන්න අවස්ථාව ලැබුණා. රූපවාහිනියෙන් පටන් අරගෙන ‘ඩාන්සින් ස්ටාර්’ චිත්‍රපටයෙන් තමයි සිනමාවට පිවිසෙන්න අවස්ථාව ලැබුණේ. ඒ මගේ පළවෙනි චිත්‍රපටය දේශීය සහ අන්තර්ජාතික සම්මානවලට පාත්‍ර වුණා. එතැනින් පටන් ගත්ත ගමන් මගට, මේ වනවිට වසර විසිපහක් පමණ සම්පූර්ණ වෙනවා.
හැනෝයි තරග බිම අතික්‍රමණය කළ ඔබේ අධ්‍යක්ෂණයක් වන මාරියා චිත්‍රපටය ගැන කතා කරමු?
මාරියා චිත්‍රපටය වියට්නාමයේ හැනෝයි සිනමා උළෙලේ (Hanoi International Film Festival) ප්‍රධානතම තරගකාරී අංශය නියෝජනයට සුදුසුකම් ලැබුවා. විශේෂම කාරණය තමයි මාරියා චිත්‍රපටයේ රඟපාපු නළුවෝ හත්දෙනාටම හොඳම නළුවාට හිමි සම්මානය හිමිවුණා. දසුන් පතිරණ, හේමාල් රණසිංහ, මහේන්ද්‍ර පෙරේරා, ප්‍රියන්ත සිරිකුමාර, දර්ශන් ධර්මරාජ්, අශාන් ඩයස් සහ සුරන් දසනායක යන දක්ෂ රංගන ශිල්පීන් තමයි මේ සඳහා දායක වුණේ. ඇත්තටම මේක සිනමාවේ අතිශය දුර්ලභ අවස්ථාවක්. මේ හත්දෙනාම සිංහල සිනමාවේ ප්‍රධාන භූමිකා රඟ දක්වපු අති දක්ෂයන්. ගැඹුරු මුහුදේ මසුන් මරන ධීවරයන් හය දෙනෙක්, නීතිවිරෝධීව ඕස්ට්‍රේලියාවට පැන යාමට උත්සාහ කරන තරුණයෙක් සහ සාගරය මැදදී ධීවර පිරිසට හමුවන අද්භූත කාන්තා රුවක් වටා තමයි මාරියා චිත්‍රපටය නිර්මාණය වුණේ.
මාරියා චිත්‍රපටය රූගත කිරීම් අතරතුර සිදුවූ ත්‍රාසජනක සිදුවීම් ගැනත් කතා කරමු?
ඔව්... අවදානම් සහිත අවස්ථා කිහිපයක්ම තිබුණා. මාරියා තමයි සම්පූර්ණයෙන්ම මුහුදේ රූගත කරපු පළවෙනි චිත්‍රපටය. සාමාන්‍යයෙන් වෙනත් රටවලනම් මේ වගේ චිත්‍රපට රූගත කරන්න චිත්‍රාගාරවල ඒවාට අවශ්‍ය පහසුකම් තියෙනවා. නමුත් ලංකාවේ අපිට ඒ වගේ පහසුකම් නැහැ. ඒ නිසා අපිට මුහුදට යන්නම සිද්ධ වුණා. අපි බෝට්ටුවල ගොඩබිම පේන්නේ නැති තරම් දුරට ගියා. අපි ජීවිතාරක්ෂක කණ්ඩායමක සහය ලබාගෙනයි තිබුණේ. විශේෂයෙන් හේමාල්ට සහ දසුන්ට මුහුදට පනින්න, ආපහු එන්න වගේ දර්ශන තිබුණා. විශේෂයෙන් හේමාල් මේ රූගත කිරීම් අවස්ථා තනියම පුහුණු වුණා. නමුත් එක් අවස්ථාවකදී ඔහුට මුහුදේ ඉඳලා උඩට එන්න අපි ලණුව දැම්මට ඒ ලණුව ගැලවිලා ඔහු යටට ගියා. වාසනාවකට ඔහුව නැවත උඩට ගන්න අපිට පුළුවන් වුණා. මේ එකක් විතරයි. මේ වගේ සිදුවීම් කිහිපයක්ම සිදු වුණා.
ඔබේ නවතම අධ්‍යක්ෂණය වන ධර්ම යුද්ධය 02 ගැන වචනයක් කතා කළොත්?
ධර්ම යුද්ධය කියන්නේ මේ රටේ සිනමා ප්‍රේක්ෂකයන් බොහොම ආදරයෙන් වැළඳගත් චිත්‍රපටයක්. ඒ වගේම ශ්‍රී ලංකාවේ ඉහළම ආදායම් වාර්තා තබපු චිත්‍රපටයක්. ධර්ම යුද්ධය පළමු දිගහැරුම අධ්‍යක්ෂණය කළේ ඉන්දියානු අධ්‍යක්ෂවරයෙක්. ඒ වගේම කැමරා ශිල්පියා, සංස්කාර ශිල්පියා ඇතුළු ඉන්දියානු තාක්ෂණික ශිල්පීන් තමයි ධර්ම යුද්ධය පළවෙනි දිගහැරුමට සම්බන්ධ වෙලා තිබුණේ. නමුත් ධර්ම යුද්ධය 02 චිත්‍රපටය සම්පූර්ණයෙන්ම නිර්මාණය වෙන්නේ ශ්‍රී ලාංකීය තාක්ෂණික ශිල්පීන්ගේ දායකත්වයෙන්. ඇත්තටම අපිට හරිම සතුටුයි අපේ දේශීය ශිල්පීන් විශ්වාස කරලා මේ වැඩේ අපිටම බාරදීපු එක ගැන. මේ වසර අවසන් වෙන්න කලින් මම හිතනවා ධර්ම යුද්ධය 02 චිත්‍රපටය ශ්‍රී ලාංකික ප්‍රේක්ෂකයන් අතරට අරගෙන එන්න පුළුවන් වෙයි කියලා. ඒ සඳහා අවශ්‍ය සියලු කටයුතු අපි දැන් ඉක්මනින් සූදානම් කරමින් පවතිනවා.
ධර්ම යුද්ධය පළමු චිත්‍රපටයේ ප්‍රධාන චරිතය වූ හරිස්චන්ද්‍රගේ චරිතයට පණ දුන් ජැක්සන් ඇන්තනී මහතාගේ අඩුව පුරවමින් මේ කාර්යය සාර්ථක කර ගත්තේ කොහොමද?
ඔව්... ඇත්තටම ප්‍රවීණ රංගන ශිල්පී ජැක්සන් ඇන්තනී මහත්මයා ධර්ම යුද්ධය පළවෙනි දිගහැරුමේදී හරිස්චන්ද්‍රගේ චරිතයට උපරිම සාධාරණයක් කරමින් ඉතාමත් අපූරු අන්දමින් චරිතය ඉදිරිපත් කළා. ඒ වගේම කියන්න ඕනෑ, ධර්ම යුද්ධය දෙවැනි දිගහැරුමේදී හරිස්චන්ද්‍ර චරිතයට පණ පොවන බිමල් ජයකොඩි කියන්නෙත් ජැක්සන් ඇන්තනී මහත්මයා වගේම ශ්‍රී ලංකාවේ සිටින ප්‍රතිභාපූර්ණ රංගන ශිල්පියෙක්. ජැක්සන් ඇන්තනී මහත්මයා වගේ විශිෂ්ටයෙකුට, දක්ෂයෙකුට සම කරන්න පුළුවන් තවත් විශිෂ්ටයෙක් ඉන්නවනම් මම හිතන්නේ ඒ තමයි බිමල් ජයකොඩි. හරිස්චන්ද්‍ර කියන ප්‍රධාන චරිතයට බිමල් ජයකොඩිව තෝරා ගැනීම ඇතුළේ හැමෝගෙම එකම උත්තරය වුණේ, “ඔව් බිමල් ජයකොඩි තමයි මේකට සුදුසුම කෙනා” කියන එක. ඒ තබපු විශ්වාසය වගේම චිත්‍රපටය රූගත කිරීමේදී ඔහු ඉතා විශිෂ්ට රංගනයක නියැළුණා. ඇත්තටම නිර්මාණයට කිසිදු හානියක් වුණේ නැහැ, ජැක්සන් ඇත්තනී මහත්මයා වෙනුවට බිමල් ජයකොඩි ප්‍රධාන චරිතයට දායක වුණා කියලා. ඒක චිත්‍රපටය ආවට පස්සේ අපේ ප්‍රේක්ෂකයන්ට දැක බලාගන්න හැකි වේවි.
ධර්ම යුද්ධය 02 සඳහා පළමුවැනි දිගහැරුමේ නොසිටි අලු‍ත් මුහුණු කිහිපයක් එකතුවෙලා තියෙනවා. ඒ ගැනත් කතා කරමු?
ධර්ම යුද්ධය 02 කියන්නෙ පළවෙනි දිගහැරුමේ යම් දිගුවක්. ඉතින් මේ කතාව නිර්මාණය වෙලා තියෙන්නෙත් ඒ පවුල වටා සිදුවෙන තවත් සිදුවීම් මුල් කරගෙන. ඉතින් කතාවේ තේමාවත් එක්ක පළවෙනි කොටසට වඩා දෙවැනි කොටසට ප්‍රධාන නළු නිළි පිරිසක් එකතු වෙනවා. ඉතින් අපි උත්සාහ කළා, එහෙම අලු‍තෙන් එකතුවෙන චරිතවලටත් ලංකාවේ ඉන්න ප්‍රසිද්ධ ප්‍රවීණ රංගන ශිල්පීන් සහ ශිල්පිනියන්ගේ දායකත්වය ලබාගන්න. මොකද ඒ හැම චරිතයක්ම ඉතාමත් වැදගත් නිසා. දිනක්ෂි ප්‍රියසාද්, බුද්ධදාස විතානාරච්චි, අශාන් ඩයස්, කළණ ගුණසේකර, මෞලි ප්‍රනාන්දු වගේ ලංකාවේ අනෙක් චිත්‍රපටවල ප්‍රධාන චරිත රඟපාපු ශිල්පීන් මේ සඳහා එකතු වුණා.
මුහුණ දීපු අභියෝග ගැනත් කතා කරමු?
ධර්ම යුද්ධය පළමු චිත්‍රපටය මීට අවුරුදු හතකට විතර කලින් තමයි රූපගත කිරීම් කළේ. ඒ කාලයේ තිබුණු ආර්ථිකය පරිසරයට වඩා හාත්පසින්ම වෙනත් ආර්ථික රටාවක් තමයි මේ වෙනකොට අපේ රටේ තියෙන්නෙ. ඉතින් අපිට ආපු ලොකුම අභියෝගය තමයි මේ සඳහා දරන්න වෙන පිරිවැය. ධර්ම යුද්ධය පළමු චිත්‍රපටය දින තිස් පහක් රූගත කිරීම් සිදු කළා. නමුත් අද තිබෙන ආර්ථික වටපිටාව සහ දරන්න වෙන පිරිවැයත් එක්ක එවැනි දින ප්‍රමාණයක් රූගත කිරීම් සඳහා යොදා ගන්න අපට හැකියාවක් ලැබුණේ නැහැ. ඒ නිසා දින විස්සක් වගේ කෙටි දින ගණනකින් තමයි අපිට මේ චිත්‍රපටයේ රූගත කිරීම් කරන්න සිද්ධ වුණේ. ඉතින් හැමෝම මහන්සිවෙලා දින විස්ස ඇතුළත මේ කාර්යය සාර්ථකව නිම කරගන්න සමත් වුණා. මම හිතනවා ඒක තමයි අපිට ආපු ලොකුම අභියෝගය.
“සිනමාව” අද තියෙන තැන ගැන අදහසක් දක්වමු?
මම හිතනවා 2024 - 2025 කියන්නේ ලාංකික සිනමාව ගැන ඉතාමත් සතුටු විය හැකි අවුරුදු දෙකක් කියලා. මේ කාලය ඇතුළත ඉතාමත් හොඳ චිත්‍රපට තිරගත වුණා. ඒ වගේම නිෂ්පාදනය වුණා. කියන්නම ඕනෑ, ප්‍රේක්ෂකයන් වැඩිපුර සිනමාහල්වලට ආකර්ෂණය වුණා මේ කාලය ඇතුළත. බොහෝ චිත්‍රපට ඉහළ ආදායම් වාර්තා තැබුවා. ඒ වගේම අලු‍ත් සිනමා ශාලා නිර්මාණය වුණා. “සිනමාව ප්‍රේක්ෂකයන් අතරට ගෙන යාමට නම් ඉතා හොඳ නිර්මාණ තිබිය යුතුයි” කියන මතයට සාධාරණයක් වෙමින් ඉතාමත් හොඳ නිර්මාණ බිහි වුණා. ඒ වගේම, මොනවා හරි දෙයක් කරලා චිත්‍රපටයක් ප්‍රේක්ෂකයන් අතරට ගෙනියන්න පුළුවන් කියන මතය මේ වෙනකොට මිත්‍යාවක් බවට පත්වෙලා තියෙනවා.
• මංගලා පවිත්‍රානි