සංක්‍රමණිකයන් 79ක් බිලිගත් ඇෆ්ගන් රිය අනතුර!
බටහිර ඇෆ්ගනිස්ථානයේ සිදු වූ රිය අනතුරකින් පුද්ගලයන් 79 දෙනකු මියගොස් තිබුණි. ඉන් 19දෙනකු ළමුන්ය. කාබුල් බලා යමින් සිටි බස් රථයක්, ට්‍රක් රථයක සහ යතුරුපැදියක ගැටීමෙන් පසු ගිනිගෙන මෙම අනතුර සිදුව ඇත.
ඉස්ලාම් කාලා නමැති ප්‍රදේශයේ සිදුවූ එම අනතුරින් යතුරුපැදිකරුවකු ඇතුළු දෙදෙනකු තුවාල ලබා රෝහල්ගත කර ඇත. බස් රථයේ සිටි සියලු දෙනා මෙන්ම අනෙක් වාහනවලින් පැමිණි දෙදෙනකු ද මියගිය පිරිසට අයත්ය. බස්රථ රියැදුරුගේ අධික වේගය සහ නොසැලකිල්ල අනතුරට හේතුව බවට සැක කෙරෙයි. මෙලෙස මියගිය බහුතරය ඉරානයේ සිට පැමිණි ඇෆ්ගන් සංක්‍රමණිකයන් විය හැකි බව සැලකෙයි.
1970 සිට, මිලියන ගණනක ඇෆ්ගන් ජාතිකයන් ඉරානයට සහ පාකිස්ථානයට පලා ගොස් ඇත. කෙසේ වෙතත් ලේඛනගත නොකළ ඇෆ්ගන් ජාතිකයන්ට ස්වේච්ඡාවෙන් පිටව යාමට ඉරානය ඉකුත් දා අවසාන නිවේදනයක් නිකුත් කළේය. ඒ අනුව ඉරානයේ සිටි ඇෆ්ගන් ජාතිකයන් විශාල වශයෙන් එරටින් පිටවීම ආරම්භ කර ඇත. එක්සත් ජාතීන්ගේ සරණාගත ඒජන්සියට අනුව ජනවාරි මාසයේ සිට ඇෆ්ගන් ජාතිකයන් මිලියන 1යි දශම 5කට වැඩි පිරිසක් ඉරානයෙන් පිටව ගොස් තිබේ.
