නයිජීරියාවේ ජනාධිපති ධූරය ප්‍රතිසංස්කරණවාදියකුට!
අප්‍රිකාවේ විශාලතම ආර්ථිකය ලෙස සැලකෙන නයිජීරියාවේ ජනාධිපති ධූරයට බෝලා අහ්මඩ් ටිනූබු පත්විය. ඔහු 1999දී රට ප්‍රජාතන්ත්‍රවාදී පාලනයට නැවත පැමිණීමෙන් පසු පත්වන නයිජීරියාවේ පස්වැනි ජනාධිපතිවරයාය. ඔහුගේ පළමු උත්සාහයේදීම රටේ ඉහළම තනතුර සඳහා ඔහු ජයග්‍රාහකයා ලෙස පත්විය.
මෙම මස අගදී 71 වැනි වියට පා තබන Tinubu, 1999 සහ 2007 අතර ලාගෝස්හි ආණ්ඩුකාරවරයාය. නයිජීරියාවේ ආර්ථික කේන්ද්‍රස්ථානය වන එම ප්‍රාන්තයේ පරිවර්තනයට තුඩුදුන් පුරෝගාමී ප්‍රතිසංස්කරණ සඳහා ගෞරවය ඔහුට හිමි වේ. ඔහු චිකාගෝහි අධ්‍යාපනය ලැබීම සඳහා නයිජීරියාවේ සිට එක්සත් ජනපදයට පිටත්ව ගිය අතර එහිදී සිය එදිනෙදා අවශ්‍යතා සපුරාලීම සඳහා පිඟන් සෝදන්නට පවා ඔහුට සිදු වූ බව ඔහු පිළිබඳ ඉතිහාසය කියයි.
නයිජීරියාවට ආපසු පැමිණීමෙන් පසු, ටිනුබු දේශපාලනයට පිවිසීමට පෙර තෙල් අංශයේ සේවය කළේය. ඔහු 1992දී නයිජීරියානු සෙනෙට් සභාවට තේරී පත් වූ අතර හමුදාව බලය අල්ලා ගන්නා තෙක් ඊළඟ වසර දක්වා එහි සේවය කළේය. 1994දී ඔහු රටින් පලා ගියේ ඔහු සම-ආරම්භ කළ ප්‍රජාතන්ත්‍රවාදී ගැති කණ්ඩායම බලය අත්හැරීම සඳහා හමුදාව පොළඹවා ගැනීමට අපොහොසත් වීමෙන් පසුවය. ඔහුගේ ආධාරකරුවන් ටිනුබුව හඳුන්වන්නේ ප්‍රධාන පෙලේ උපායමාර්ගිකයෙකු සහ වසර ගණනාවක් සිංහාසනයට නැගීමට දිගු කාලිනව සැලසුම් කරමින් සිටියෙකු ලෙසය.
