යුක්‍රේන යුද්ධයට මාසයයි! සාම කතාමැද බෝම්බ සහ රොකට් වැසි
යුක්‍රේන යුද්ධයට දැන් මාසයකි. සටන් විරාමය තහවුරු කර ගැනීමේ රාජ්‍ය තාන්ත්‍රික ප්‍රයත්නයන් දෙරට අතර දිගටම පවතියි. කියෙව් නගරයට බෝම්බ සහ රොකට් වැසි පතිත වෙද්දී මිලියන 3ක් උන්හිටි තැන් අහිමිව සරණාගතව පලා ගොසිනි. ඒ අතර යුක්‍රේනයේ සමහර ප්‍රදේශවල වසන්ත ධාන්‍ය වැපිරීම ආරම්භ කර ඇත. එක්සත් ජනපද ජනාධිපතිවරයා තමන් යුක්‍රේනයට දක්වන සහාය තවත් වැඩි කරන බව ප්‍රකාශ කළේ මෙවන් පසුබිමකය.
යුක්‍රේනයේ තුන්වැනි විශාලතම නගරය වන ඔඩේසාහි වැලි මලු පුරවා ගොඩ ගසමින් එහි වැසියෝ ළඟ ළඟ එතැයි ඔවුන් බියවන නාගරික සටන සඳහා ඉදිරි පෙළ ආරක්ෂක වළලු තනමින් සිටිති. රුසියාවට ඈඳාගත් ක්‍රිමියානු අර්ධද්වීපයේ සිට විශාල රුසියානු උභයජීවී යුද යාත්‍රාවක් කළු මුහුදේ වෙරළ තීරය ඔස්සේ නගරයට ළඟා වෙමින් සිටින බවට ලැබෙන වාර්තා හේතුවෙන් මේ වනවිට වෙරළ තීරයේ දිගට බිම් බෝම්බ වළ දමා ඇත.
ක්‍රිමියාවට කිලෝමීටර් 300ක් (සැතපුම් 186ක්) බටහිර දෙසින් පිහිටි මිලියනයක් වෙසෙන ඔඩේසාව යුක්‍රේනය සහ රුසියාව යන දෙරටටම උපායමාර්ගික වශයෙන් ඉහළ වැදගත්කමක් ඇති වත්කමක් ලෙස සලකනු ලබයි. එහි ඇද වැටීම යුක්‍රේනයට සැලකිය යුතු ප්‍රතිවිපාක ඇති කිරීමට සමත්ය. එය අල්ලා ගැනීමෙන් රටේ සෙසු ප්‍රදේශ කළු මුහුදෙන් වෙන්වන අතර ගොඩබිම තුළ කොටු වී යයි.
මේ අතර ''සිය ගණනක්'' සිවිල් වැසියන් නවාතැන් ගෙන සිටි Mariupol හි රඟහලකට සහ තටාක පහසුකමකට රුසියාව පහර දුන් බව යුක්‍රේනය කීවේය. විය යුතු සේම මොස්කව් එම ප්‍රකාශය ප්‍රතික්ෂේප කළේය. එක්සත් ජනපද ජනාධිපති ජෝ බයිඩන්, රුසියානු ජනාධිපති ව්ලැඩ්මීර් පුටින් ''යුද අපරාධකරුවෙකු'' ලෙස හඳුන්වා දුන්නේය. ඒ අතරම තමන් යුක්‍රේනය ට අතිරේක ඩොලර් මිලියන 800ක ආරක්ෂක ආධාරයක් ලබාදෙන බවට ප්‍රකාශ කළේය.
රුසියානු ජනාධිපතිවරයා පිළිබඳ Biden ගේ ප්‍රකාශය ''පිළිගත නොහැකි'' යැයි ක්‍රෙම්ලිනය දෝෂාරෝපණය කළ අතර මොස්කව් යුක්‍රේනයයේ සිය ඉලක්ක සපුරා ගන්නා බව පුටින් කියා තිබුණි. ක්‍රෙම්ලිනයට අනුව කියෙව් සහ මොස්කව් අතර සාම සාකච්ඡා දැනටත් මාර්ගගතව පැවැත්වේ.
රුසියාව යුක්‍රේනය සමඟ සාකච්ඡා කරන බව ලෝකයට මවාපාමින්, ඔවුන් වෙනත් තැන්වලද භාවිතා කර ඇති ම්ලේච්ඡ උපාය මාර්ගයකට අනුකූලව තම අසල්වැසියා තදින්ම ආක්‍රමණය කරමින් සිටින බව ප්‍රංශ විදේශ අමාත්‍ය Jean-Yves Le Drian මේ තත්ත්වය විස්තර කරමින් පෙන්වා දී තිබේ.
ඒ අතර රුසියාව විසින් යුක්‍රේනය ආක්‍රමණය කිරීම සම්බන්ධයෙන් ඉන්දියාවේ ස්ථාවරය ගැන එක්සත් රාජධානිය දැඩි කලකිරීමට පත්ව සිටින බව එරට වෙළඳ අමාත්‍ය ඈන්-මාරි ට්‍රෙවේලියන් කීවේය. ඉන්දියාව තවමත් සිය රටේ වැදගත් වෙළඳ හවුල්කරුවෙකු ලෙස සලකන නමුත්, සෙසු ලෝකයා පුටින්ට යුද්ධය සඳහා අරමුදල් හිඟකෙරෙන අන්දමේ තද පිළිවෙතක් අනුගමනය කරද්දී ඉන්දියාව පමණක් වෙනස් මඟක් ගැනීම වැරදි සහගත බව ඇය පෙන්වා දෙයි.
රුසියානු ආක්‍රමණය හේතුවෙන් නේටෝව සිය නැඟෙනහිර පැත්තේ මිත්‍ර රටවල ආරක්ෂාව තර කිරීමට පියවර ගෙන ඇත. ඒ අනුව යමින් බ්‍රිතාන්‍යය සිය ස්කයි සේබර් මිසයිල පද්ධතිය පෝලන්තයේ ආරක්ෂාව සඳහා යොදවන බව එහි ආරක්ෂක ඇමති වෝර්සෝහි සංචාරයකදී කියා තිබේ.
මේ සියලු කතා මැද තමන් 1991 දී සෝවියට් සංගමය බිඳවැටුණු අවස්ථාවේ තිබූ පරිදි යුක්‍රේනයේ ජාත්‍යන්තර දේශසීමා රුසියාව ඇතුළු සෙසු ලෝකයා පිළිගත යුතු බවට දැක්වූ ස්ථාවරය කිසිසේත්ම වෙනස් කර නොමැති බව යුක්‍රේන ජනාධිපති Volodymyr Zelenskyy කියා තිබුණේ ඇවිලෙන ගින්නට නැවතත් පිදුරු දමමිනි.