ඇමැති කුමාරට වැටුණු දූෂණ චෝදනා “තොප්පිය”
ජාතික ජනබලවේගය (NPP) රජයේ කැබිනට් අමාත්‍යවරයකුට එරෙහිව එල්ල වී ඇති පැරණි දූෂණ චෝදනා මේ වනවිට දේශපාලන කරළියේ දැඩි ආන්දෝලනයක් නිර්මාණය කර තිබේ. මෙය දූෂණයෙන් තොර පාලනයක් පිළිබඳ පොරොන්දුව මත බලයට පැමිණි නව රජයට එල්ල වී ඇති ප්‍රධානතම අභියෝගය ලෙස බොහෝ දෙනා පෙන්වා දෙති. බලශක්ති අමාත්‍ය කුමාර ජයකොඩි මහතාට එරෙහිව මතුවී ඇති මෙම චෝදනා පිළිබඳව මාධ්‍ය මෙන්ම සමාජ මාධ්‍ය තුළ ද මේ වනවිට පුළුල් සාකච්ඡාවක් ආරම්භ වී ඇත.
මෙම චෝදනාව යළිත් කරළියට පැමිණියේ මෑතකදී පාර්ලිමේන්තු මන්ත්‍රී ෂානක්කියන් රාසමාණික්කම් මහතා පාර්ලිමේන්තුවේදී කළ ප්‍රකාශයක් සමගිනි. රාසමාණික්කම් මන්ත්‍රීවරයා සිහිපත් කළේ ජාතික ජනබලවේගයේ කැබිනට් අමාත්‍යවරයකුට එරෙහිව වංචා චෝදනා ඇති බවය. එසේම ඔහු අධිකරණයෙන් වරදකරු කරනු ලැබූ බවද රාසමාණික්කම් හෙළිදරව් කළේය. මෙම ප්‍රකාශයෙන් පසුව අමාත්‍ය කුමාර ජයකොඩි මහතාගේ නම සමාජය තුළ ප්‍රසිද්ධියට පත් විය. බොහෝ දෙනෙක් ඔහු පිළිබඳ අවධානය යොමු කළහ.
ඒ සමඟම අල්ලස් හෝ දූෂණ චෝදනා කොමිෂන් සභාව මෙම චෝදනා සම්බන්ධයෙන් විමර්ශනයක් ආරම්භ කිරීමට සූදානම් වන බවටද ප්‍රවෘත්ති වාර්තා පළ විය. ඒ අනුව මෙය ඉතාම බරපතළ දේශපාලන සිදුවීමක් බවට පෙරළෙමින් ඇති බව පැහැදිලි වූයේය. අතීත වර්තමාන සිදුවීම් පිළිබඳ සාධාරණ කියවා ගැනීමක අවශ්‍යතාව මතුවූයේ ඒ අනුවය.
මෙම චෝදනාවල මූලාරම්භය 2015 වසර දක්වා දිව යයි. එකල ඔහු ලංකා පොහොර සමාගමේ ප්‍රසම්පාදන සහ ආනයන අංශයේ කළමනාකරු ලෙස කටයුතු කර ඇත. ඔහුම පවසන පරිදි එම චෝදනාවට හේතු වී ඇත්තේ ලංකා පොහොර සමාගමේ හුණුපිටිය ගබඩා සංකීර්ණයේ භූමිය මත කාපට් ඇතිරීම සඳහා සිදුකළ ප්‍රසම්පාදන ක්‍රියාවලියකදී සිදු වූ දෝෂයකි. මෙම සිද්ධිය සම්බන්ධයෙන් රුපියල් ලක්ෂ 80ක මුදල් අවභාවිතයක් සම්බන්ධයෙන් චෝදනා එල්ල වී ඇති බව පෙරටුගාමී සමාජවාදී පක්ෂය ද පසුගිය දා සඳහන් කර තිබුණි.
මෙම චෝදනාව සම්බන්ධයෙන් රූපවාහිනී වැඩසටහනකදී අදහස් දැක්වූ අමාත්‍යවරයා සඳහන් කළේ එම ක්‍රියාවලියේදී අදාළ ගොනුවේ අඩංගු කරුණු පහළ නිලධාරියකු විසින් නිසි ලෙස නොබැලීම නිසා මෙම ගැටලු‍ව ඇතිවූ බවයි. ලංකා පොහොර සමාගමේ හුණුපිටිය ගබඩා සංකීර්ණයේ භූමිය මත කාපට් ඇතිරීම සඳහා සිදුකළ ප්‍රසම්පාදන ක්‍රියාවලියක පැවති දෝෂයක් එම චෝදනාවට හේතු වී තිබේ.
“ඕනෑම මැනේජර් කෙනකුට වගකීමක් තියෙනවනෙ, වැඩ කරනකොට අතපසුවීම් හරි, මිස්ටේක්ස් හරි වෙන්න. මට දුන්න මේකෙ මම. කොක්කක් ගහල යවපු එක විතරයි තියෙන්නෙ. සබ්ජෙක්ට් එක කරන කෙනා ඒක බලපු නැති එකෙන් හරි උවමනාවෙන් හරි එතැන මේවා වුණා. ඒකෙ මට වගකීමක් නැහැ කියන්නෙ නෑ.”
කෙසේ වෙතත් එහි වගකීමෙන් තමන්ට සම්පූර්ණයෙන්ම ගැලවිය නොහැකි බවද ඔහු පිළිගත්තේය. තවද මෙම චෝදනා දේශපාලනික පළිගැනීමක් බවටද ඔහු ඉඟි කරනු දැකගත හැකිය.
මෙම සිදුවීම පිටුපස කුමාර ජයකොඩි මහතාගේ දේශපාලන සහ වෘත්තීය පසුබිම පිළිබඳවද අවධානය යොමුවේ. ඔහු 2005 වසරේදී එවකට කෘෂිකර්ම අමාත්‍යවරයා ලෙස කටයුතු කළ අනුර කුමාර දිසානායක මහතාගේ ඉල්ලීම මත ලංකා පොහොර සමාගමේ කළමනාකාරවරයා ලෙස පත් වී තිබේ. 2015 වසරේදී ඇතිවූ ගැටලු‍වෙන් පසු ඔහු එම තනතුරෙන් ඉවත් වී ඇත. 2024 නොවැම්බර් මස පැවති මහ මැතිවරණයෙන් පසු ජාතික ලැයිස්තු මන්ත්‍රීවරයකු ලෙස ඔහු පාර්ලිමේන්තුවට පිවිසි අතර, වත්මන් ආණ්ඩුවේ බලශක්ති අමාත්‍යවරයා ලෙස පත් කරනු ලැබීය. මෙම සමීප සබඳතාව නිසා මෙම චෝදනාව පිළිබඳව වත්මන් ජනාධිපතිවරයාගේ ස්ථාවරය ප්‍රශ්නගතව ඇති බව සඳහන් කළ යුතුය.
පෙරටුගාමී සමාජවාදී පක්ෂය (FSP) ඇතුළු විපක්ෂයේ පාර්ශ්ව මෙම සිදුවීම සම්බන්ධයෙන් දැඩි විවේචන එල්ල කරති. පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ මහතා පෙන්වා දෙන්නේ කුමාර ජයකොඩි මහතාට එරෙහිව පොහොර සංස්ථාවේදී විනය පරීක්ෂණයක් පවා පැවැත්වූ බවත්, එම පරීක්ෂණයෙන් ඔහු වරදකරු කරනු ලැබූ බවත්ය. ඒ අනුව තනතුරෙන් පහත හෙළීමට එවකට අධ්‍යක්ෂ මණ්ඩලය තීරණය කළ බවද ඔහු සඳහන් කළේය.
නව රජය බලයට පැමිණියේ දූෂණ හා වංචා සම්බන්ධයෙන් වරදකරුවන් වූ කිසිවකුට හෝ චෝදනා ලබන කිසිවකුට රජයේ තනතුරු නොදෙන බවට පොරොන්දු වෙමිනි. එහෙත් මූල්‍ය වංචා සම්බන්ධයෙන් වරදකරුවකු වූ බවට චෝදනා ලබන පුද්ගලයකු කැබිනට් අමාත්‍යවරයකු ලෙස පත් කිරීම රජයේ දූෂණ විරෝධී ප්‍රතිපත්තියේ අවංකභාවය පිළිබඳව බරපතළ ප්‍රශ්න මතු කරයි. ජනතාව තැබූ විශ්වාසය මෙවැනි ක්‍රියා නිසා බිඳවැටිය හැකි බව දේශපාලන විචාරකයෝ පෙන්වා දෙති.
මෙම චෝදනාවලට ප්‍රතිචාර දක්වමින් කම්කරු නියෝජ්‍ය අමාත්‍ය මහින්ද ජයසිංහ මහතා ප්‍රකාශ කළේ කුමාර ජයකොඩි මහතා කිසිදු වංචාවක් සිදුකර නොමැති බවයි. ඔහු පවසන්නේ පහළ නිලධාරීන් විසින් සිදුකරන ලද යම් ක්‍රියාවක් සඳහා ඉහළ නිලධාරියකු ලෙස කුමාර ජයකොඩි අත්සනක් පමණක් යොදා ඇති බවයි. ඔහුට එල්ල වී ඇත්තේ හුදෙක් අත්සනක් යෙදීම සම්බන්ධයෙන් වන චෝදනාවක් බව ජයසිංහ මහතාගේ අදහසයි. තවද මෙම සිදුවීමෙන් පසු ඔහුට නැවත රැකියාව ලබා දුන්නද තනතුරෙන් පහත හෙළන ලැබූ නිසා ඔහු එම රැකියාව බාර නොගත් බවද ජයසිංහ මහතා සඳහන් කළේය.
මෙම චෝදනා සහ ප්‍රතිවිරුද්ධ අදහස් හමුවේ අල්ලස් හෝ දූෂණ චෝදනා කොමිෂන් සභාව මෙම කාරණයේදී කිසිදු දේශපාලන බලපෑමකට යටත් නොවී ස්වාධීනව කටයුතු කරනු ඇතැයි ජනතාව අපේක්ෂා කරති. කෙසේ වෙතත් මෙම සිදුවීම නව රජය පිළිබඳ ජනතාව තැබූ විශ්වාසය බිඳ දමනු ඇතැයි බොහෝ දෙනා බිය පළ කරති. දූෂණයට එරෙහිව සටන් කිරීමේදී ආණ්ඩුවට දෙබිඩි පිළිවෙතක් අනුගමනය කළ නොහැකි බවත්, මෙම චෝදනා සම්බන්ධයෙන් වහාම විධිමත් විමර්ශනයක් පවත්වා අදාළ තීරණ ගත යුතු බවත් විපක්ෂය සහ සිවිල් සංවිධාන පෙන්වා දී තිබේ.
කුමාර ජයකොඩි මහතාගේ මෑත කාලීන ක්‍රියාකලාපයන් පිළිබඳවද විවේචන එල්ල වී ඇත. රනිල් වික්‍රමසිංහ සහ කාංචන විජේසේකර වැනි හිටපු අමාත්‍යවරුන්ට සම්මත කරගත නොහැකි වූ විදුලිබල පනත සම්මත කරගැනීමට ඔහු කටයුතු කිරීම විදුලිබල මණ්ඩලය පෞද්ගලීකරණය කිරීමට මග පෑදීමක් ලෙස ඇතැම් පිරිස් දකිති. එසේම “මන්නාරමේ එක කුරුල්ලෙක්වත් නෑ” වැනි මතභේදාත්මක ප්‍රකාශ සහ විදුලිය ඇනහිටීම් සඳහා “වඳුරෙක්” හේතුව බව පැවසීම වැනි සිදුවීම් නිසා ඔහු රටටම විහිළුවක් වූ බවටද චෝදනා එල්ල වේ.
මෙවැනි තත්ත්වයක් තුළ විධායක බලය ක්‍රියාත්මක කරන කැබිනට් මණ්ඩලයේ තවදුරටත් කුමාර ජයකොඩි මහතාව තබාගැනීම බරපතළ තත්ත්වයක් බවට තර්ක මතුව තිබේ. එම නිසා රජය වහාම මේ සම්බන්ධයෙන් රටට පැහැදිලි කිරීමක් කළ යුතු බවත්, අමාත්‍යවරයාව තනතුරෙන් ඉවත් කර විධිමත් විමර්ශනයක් පැවැත්විය යුතු බවත් සමාජය තුළ ප්‍රබල මතයක් ගොඩනැගී ඇත. නව රජයේ දේශපාලන සංස්කෘතිය වෙනස් කිරීමේ පොරොන්දුව මෙම චෝදනාවලට දක්වන ප්‍රතිචාරය මත තීරණය වනු ඇතැයි චෝදනා නගන පිරිස් කියා සිටිති.
කෙසේ වෙතත් මේ වනවිටත් පරීක්ෂණයකින් විසඳී අවසන් කළ චෝදනාවක් නැවත ඉස්මතු කරමින් සිදුකරන මෙම අදහස් දැක්වීම් දේශපාලනික පළිගැනීමක් බව ආණ්ඩු පාර්ශ්වයෙන් කියැවෙයි. මෙය හුදෙක් දේශපාලන අවශ්‍යතාව ඉස්මතු කරන චෝදනාවක් බව එම පාර්ශ්වය විසින් කියැවේ. මෙම චෝදනාව මතුවන ආකාරය සහ එම චෝදනාව ගොනුකරන පිරිස් දෙස බැලූ විට එහිද යම් පමණක සත්‍යතාවයක් තිබෙන බව බැහැර කළ නොහැකි සත්‍යයකි.
• චමිඳු නිසල් ද සිල්වා