රනිල් අත්අඩංගුවට!
ගයාන් ගාල්ලගේ I
පොදු දේපල පනත අැතුළු චෝදනා තුනකට 8 වැනි විධායක ජනාධිපති රනිල් වික්‍රමසිංහ මහතා පසුගිය සිකුරාදා (22) අපරාධ පරීක්ෂණ දෙපාර්තමේන්තුව විසින් අත්අඩංගුවට ගත්තේය. අත්අඩංගුවට ගැනීමෙන් පසුව රනිල් වික්‍රමසිංහ මහතා කොටුව මහේස්ත්‍රාත් අධිකරණයට ඉදිරිපත් කළ අතර පුවත්පත මුද්‍රණය වන විටත් නඩුව විභාග වෙමින් පැවතිණි.
අත්අඩංගුවට ගැනීමෙන් පසුව රනිල් වික්‍රමසිංහ මහතා කොටුව මහේස්ත්‍රාත් අධිකරණයට ඉදිරිපත් කළ අතර පුවත්පත මුද්‍රණය වන විටත් නඩුව විභාග වෙමින් පැවතිණි.
නඩුව අාරම්බ වී එක් චෝදනාවකට ඇප ලබා දුන් අතර පසුව අනෙක් ෙචා්දනා දෙකට ඇප ලබා දීම සඳහා අධිකරණයේ වැඩ කටයුතු විනාඩි 30 කාලයක් කල් තැබීමට මහේස්ත්‍රාත් නිලුපුලී ලංකාතිලක මහත්මිය නියෝග කළාය. කෙසේ වෙතත් ඒ අතර කාලයේ අධිකරණ ශාලාවේ විදුලි විසන්ධි වීමත් සමඟ නඩු විභාගය තව දුරටත් වේලාවක් නොමැතිව කල් යන ලදී. ඒ අනුව රාත්‍රී 8.15 වන විටත් නඩුව සම්බන්ධව අවසන් තින්දුවක් ප්‍රකාශ කර තිබුණේ නැත.
මහා බ්‍රිතාන්‍යයේ සරසවියක පැවති සිය බිරිඳගේ උපාධි ප්‍රදානෝත්සවය සඳහා සහභාගි වීමට රනිල් වික්‍රමසිංහ මහතා ඇතුළු පිරිසක් රාජ්‍ය මුදල් අවභාවිත කරමින් රජයට මූල්‍යමය පාඩුවක් කිරීම සම්බන්ධයෙන් හිටපු ජනාධිපතිවරයා මෙලෙස අත්අඩංගුවට ගනු ලැබීය. දණ්ඩ නීති සංග්‍රහයේ 386, 388 සහ පොදු දේපල පනතේ 5 (1) වගන්තිය යටතේ වරදක් කරන ලදැයි චෝදනා කරමින් අපරාධ පරීක්ෂණ දෙපාර්තමේන්තුවේ මූල්‍ය විමර්ශන අංශය විසින් රනිල් වික්‍රමසිංහ මහතාව අත්අඩංගුවට ගනු ලැබීය. මෙම නඩුවේ පැමිණිල්ල වෙනුවෙන් රජයේ අතිරේක සොලිසිටර් ජනරාල්, ජනාධිපති නීතිඥ දිලීප පීරිස් මහතා සමඟ නියෝජ්‍ය සොලිසිටර් ජනරාල් වසන්ත පෙරේරා සහ රජයේ ජ්‍යෙෂ්ඨ අධිනීතිඥ සමදරී පියසේන මහත්මිය ප්‍රමුඛ නීතිඥ මණ්ඩලයක් පෙනී සිටියහ. හිටපු ජනාධිපති රනිල් වික්‍රමසිංහ මහතා වෙනුවෙන් ජනාධිපති නීතිඥවරුන් වන අනූජ ප්‍රේමරත්න, රොමේෂ් ද සිල්වා, අලි සබ්රි, අනිල් ද සිල්වා ප්‍රමුඛ නීතිඥවරුන් පිරිසක්ම පෙනී සිටියහ.
රනිල් වික්‍රමසිංහ මහතා අධිකරණයට ඉදිරිපත් කළ අවස්ථාවේදී විපක්ෂයේ ජ්‍යෙෂ්ඨ දේශපාලනඥයන් රැසක්ම අධිකරණ භූමියට පැමිණ සිටියහ. ඒ අය අතර හිටපු අගමැති දිනේෂ් ගුණවර්ධන, හිටපු ඇමැතිවරුන් වන අකිල විරාජ් කාරියවසම්, සාගල රත්නායක සහ ශ්‍රී ලංකා පොදුජන පෙරමුණේ ජාතික සංවිධායක නාමල් රාජපක්ෂ, අනුර ප්‍රියදර්ශන යාපා, කබීර් හෂීම්, ජීවන් තොණ්ඩමන්, තලතා අතුකෝරළ, සුජිත් සංජය පෙරේරා, සුගීෂ්වර බණ්ඩාර යන මහත්ම මහත්මීහුද වූහ.
මෙරට විධායක ජනාධිපතිවරයකු අත්අඩංගුවට ගත් පළමු අවස්ථාව ලෙස මෙය ඉතිහාසගත වේ.
