ඇමැතිවරු 4ක් ආණ්ඩුවෙන් යති! අලුත් ගමනකට සූදානමක්
ගයාන් ගාල්ලගේ I
කැබිනට් මණ්ඩලයේ සිටින අමාත්‍යවරුන් කිහිප දෙනකු ඉදිරි කාලයේදී සිය ඇමැති තනතුරුවලින් ඉවත්ව නව දේශපාලන ව්‍යාපාරයක් ආරම්භ කිරීමට තීරණය කර ඇතැයි විශ්වාස කටයුතු ආරංචි මාර්ග සඳහන් කරයි.
එහි ආරම්භය ගැනීම සඳහා ඉඩම් හා සංචාරක අමාත්‍ය හරීන් ප්‍රනාන්දු මහතා ඉදිරි කාලයේ සිය අමාත්‍ය ධුරයෙන් ඉවත් වීමටද තීරණය කර ඇතැයි එම ආරංචි මාර්ග සඳහන් කරයි.
ඔහුට අමතරව තවත් කැබිනට් අමාත්‍යවරුන් තිදෙනකුද මෙම දේශපාලන ව්‍යාපාරය සමඟ එක්වනු ඇතැයි දැනගන්නට තිබේ.
මෙකී දේශපාලන ව්‍යාපාරය හිටපු කතානායක කරු ජයසූරිය මහතා සහ ප්‍රවීණ මාධ්‍යවේදී වික්ටර් අයිවන් විසින් දැනටමත් ක්‍රියාත්මක කෙරෙන "සාධාරණ සමාජයක් සඳහා වන ජාතික ව්‍යාපාරය" සමඟ බද්ධව සිදු කිරීමට තීරණය කර තිබේ.
හිටපු කතානායක කරු ජයසූරිය මහතා සහ වික්ටර් අයිවන් මහතා සිය ජාතික ව්‍යාපාරය සම්බන්ධයෙන් කැබිනට් මණ්ඩලය හමුවේ මෑතකදී එක් අවස්ථාවක දේශනයක් ද සිදු කළේය. ආරම්භ කිරීමට යෝජිත නව දේශපාලන ව්‍යාපාරය දේශපාලන ආර්ථික සහ සමාජයීය පරිවර්තනයක් සිදු කිරීම අරමුණු කර ගනිමින් ජාතික ප්‍රතිපත්තියක් සමඟ ගොඩනැගීමට දැනටමත් තීන්දු කර ඇත. මේ සඳහා සිවිල් ව්‍යාපාර, වෘත්තීය සමිති සහ අරගලයේ කොටස්කරුවන් එක්කර ගැනීමටත් යෝජනා වී තිබේ.
