2018 දෙසැම්බර් 22 වන සෙනසුරාදා

දේව දයා සම කරුණා උල්පත සීත රැයේ බෙත්ලෙහෙමෙන් මතුවිය

 2018 දෙසැම්බර් 22 වන සෙනසුරාදා, ප.ව. 12:30 146

සීතල දවටාගෙන සපැමිණි විනිවිද දුහුල් සළුවට මම සුළං රැල්ලයයි කියමි. ළා රන්වන් හිරු දහරේ සේද සේල හෙමින් හෙමින් විත් මුවා කළ මන්දාරම් ළා අඳුරට මම දෙසැම්බරයයැයි කියමි. රෑ අහසේ අඳුරු ඝන තිර අතරින් පතර මෝදු වූ රන් තාරුකාවකට මම ඒ ඔබේ ස්නේහයයැයි කියමි. හෙමින් හෙමින් හෙමින් ඇවිත් ඇඟිලි තුඩු අග්ගිස්සෙන් වලාකුළු මිරිකා මහපොළොවට මුදාහල මුතු සිලි සිලියට මම මල් වැස්සයැයි කියමි. දේවදාර ගස් මැද්දෙන් හැම ඉරිදාවකම ඔබ සොයා මම ආවෙමි. සියක් දහසක් හදවත් ප්‍රේමයෙන් පිරිමැද පව්කාර මිනිස් සිතුවිලි වෙනුවෙන් ඔබ නිර්මල හදවත කුරුසියට කැපකළ හෙයින් මම ඔබට ගැලවුම්කාරයාණන් යැයි ආමන්ත්‍රණය කරමි. මිනිස් භවයක ජනිත මිනිස් ප්‍රාණයේ ගැඹුර විනිවිද ඔබේ හද ගැඹුරේ අනන්ත දේවත්වයක් දුටු හෙයින් ජේසුනි මම ඔබට දෙවියන් වහන්සේයැයි කියමි.

ඈත බෙත්ලෙහෙමේ ගවලෙනින් මතු වූ ඒ විමුක්තියේ හඬ භක්ත්‍යාදර ආදරයෙන් සමරන නත්තලේ මම ඔබට ප්‍රේම කරන බව ලෝකයටම කියමි. ඒ ඔබ අදෘශ්‍යමන දෙවියන් ලෙස නොව ජේසු නම් මිනිසා ලෙසින් පැමිණ මිනිස් වග පාපයෙන් ගලවන්නට කල්වාරි කඳු මුදුනේදී කුරුසියට ළය ලෙය දන්දුන් හෙයිනි. ජේසුනි මමත් ඇවිද යමි මතක මං දිගේ ඒ දුර කල්වාරියට..

ජේසුනි... ඔබ උපන් ශුභාරංචිය ලෝකයටම කියන්නට එදා බෙත්ලෙහෙමෙට මුදුන් අහසේ වල්ගා තරුවක් දිස්වූයේය. ඈත ඈත ඉසව් දනව් පසුකර රජුන් රන්, මුතු, මිණි තෑගි ගෙන ගව ලෙනෙක ගව ඔරුවක උපන් පුතුන් දකින රිසින් පැමිණියේ දෙවියන් වහන්සේගේ පුත්‍රයා මනුෂ්‍ය සංහතියම පවින් මුදවාගන්නා ගැලවුම්කාරයාණන් වී මනුෂ්‍ය ලෝකයට පැමිණ උත්පත්තිය ලබන්නේ ගවලෙනක බව අනාවැකිකරුවකු කී අනාවැකිය රාජ රාජ ඒ උතුමන් දැන සිටි හෙයිනි. ජුසේ තුමාගේ සිත මහා සතුටකි. මරියතුමිය රක්ත වර්ණ රුහිරු දහරා ශ්වේත වර්ණ කිරි දහරා බවට පරිවර්තනය කළ ස්නේහයේ අනුහසින් පුතුන් ළමැදේ හොවා ගත්තීය.

බාලොලි බලොලියේ.. බාලොලි බලොලියේ 
බාලොලි බලොලියේ.. බාලොලි බලොලියේ 

ජේසුයැයි නම් ලද ජුසේ තාත්තාගේ පුතණුවන් මරිය තුමිය නැලවූයේ ඒ නැළවිලි ගීයෙන්දැයි අසන්නට කවුරුත්ම අද නැත¦ එදා සිටි.
සිංහල භාෂාවේ අරුත් විරහිත නමුදු කාව්‍ය රසයෙන් සහ ගී රසයෙන් සුප්‍රාණවත් සුපොහොසත් සුගායනීය වචන හමුවේ. බාලොලි යන්නද එවන් වචනයකි. දරු නැලවිලි සඳහා යොදාගන්නා ඒ වචනය අර්ථ රසයෙන් වියුක්ත නමුදු රස භාව ගී රසයෙන් සුපෝෂිත වචනයකි. මේ ගී පද රචනය සඳහා බාලොලි යන ඒ වචනය මෙන්ම සරල සුගම අරුත් පිරි සුයෝග්‍ය වචන දහරාවක්ම යොදාගෙන ඇති අයුරු සැබැවින්ම අපූරැය. 

මිනිස් වෙසින් ආ විමුක්තියේ හඬ 
මරිය මවුන් නැලවිල්ලට මුසුවන 

මනුෂ්‍ය වේශයෙන් මනුෂ්‍ය සංහතියේ දුක් පිරිපත සංසිඳවා මිනිස් වග පවින් ගලවාගනු වස් පැමිණියේ දෙවියන් වහන්සේගේ පුත්‍රයාණෝය. නොඑසේනම් විමුක්තියේ සැනසිල්ලේ නිවීමේ හඬය. ඒ දිව්‍ය පුත්‍රයාණෝ සීතල කඩු තුඩු මෙන් ගත සිත හිරිවට්ටන සීතල දෙසැම්බරයේ ගව ඔරුවේ හිඳ බාලොලි බාලොලි ගීය අසමින් මරිය මවුන් ළැම උණුහුමේ ගුලි ගැසෙන්නට ඇත. ඒ ගුලි ගැසුණු දෙව් බිලිඳුන් ස්වර්ගයේ සැනසුම පිණිස ස්වර්ග මාවතේ ද්වාරය හරින විමුක්තිදායකයාණන් වග ලෝකයට දැනුම් දුන්නේ සොබාදහමේ වස්තුවකි.. අහස මුදුනත දිස්වූ මහා තරුවකි.

ස්වර්ග රාජයේ දොරගුළු හැරලන 
දෙව් බිලිඳෙක් ගව ලෙන් ගැබ ඉපදුණ 

එදා දිව්‍ය පුත්‍රයාණෝ මරිය මවුන් කුස යහනත කරගෙන මේ ලෝකයට පැමිණෙද්දී එහි විසුවේ දුකින් පීඩිත මහා දුක් කඳු දෙවුර දරාගත් ජනතාවකි. නීතියෙන් රීතියෙන් සහ පාලකයන්ගේ සර්ව බලධාරී ඒකාධිපතීත්වයෙන් උන්ගේ දෑතට දෙපයට විමසුමට විචාරයට විචක්ෂණයට විලංගු ලා තිබුණි. ඒ දුක එකළු කරන අනාගත රන් තාරුකාව.. හෙවත් දේව දයාවේ දිව්‍යමය ස්වරය එදා බෙත්ලෙහෙමෙන් ජනිත විය. ප්‍රේමයේ උල්පත බෙත්ලෙහෙමේ දුප්පත් ගව මඩුවක ගව ඔරුවක ජීවය ලද්දේය.

දෑත දෙපය දැඩි යදම් බඳින ලද 
දුක්බර වූ ජනතාව අවදි කර 
දේව දයා සම කරුණා උල්පත 
සීත රැයේ බෙත්ලෙහෙමෙන් මතුවිය 

පාප අඳුර නෙක බිය සැක දුරලන 
නව චින්තනයට මාවත හෙළි කළ 
රුවන් තාරුකා එළියක් දිස්විය 
රුවන් තලේ හිඳ බැලුම් හෙලා ඇත 

නව චින්තනයකට නව දැක්මකට මාවත හෙළි කළ නියමුවාණෝ පැමිණි වග කී පහන් තාරකාව නත්තල් දා රෑ අහසේ අදත් මම සොයමි. ඒ නැවතත් ලෝකය පාපයෙන් මුදවා ගන්නට විශ්වීය ගැලවුම්කාරයකු අවැසි බව යාවත්කාලීන වන නෙක සමාජ සංසිද්ධීන් අරුත් පසිඳින බැවිනි. දෙවියන් සහ දේව ධර්මය මේ විශ්වය තුළ පවතින බව විශ්වාස කළත් ඒ දෙවියන්ගෙන් සහ දේව ධර්මයෙන් ක්ෂණයක් ක්ෂණයක් පාසා මිනිස් හදවත් දුරින් දුරටම  දුරස් වන බව දැනෙන හෙයිනි. හැඟෙන හෙයිනි. සිතෙන හෙයිනි.

දෙවියන් වහන්සේගේ පුත්‍රයන් නොව යක්ෂයන්ගේ පුත්‍රවරුන් සහ දියණිවරුන් නිතර මඟ තොට මුණගැසෙන සමාජ ඛේදවාචකයක් තුළ.
දෙවියනි ඔබ කොහිද? 
ප්‍රශ්නය මගේය. උත්තරය ඔබගේය.

 

► දන්ත ශල්‍ය වෛද්‍ය අසේල විජේසුන්දර