වට්ටක්කෙනුත් Music

සංගීත කණ්ඩායමක් කිව්වම අපේ ඔළුවෙ මැවෙන්නේ, ඩ්‍රම් කට්ටලයක්, ගිටාර් දෙක තුනක්, කී බෝඩ් එකක් වගේ විවිධ සංගීත උපකරණ කිහිපයක් එකතු කරගත්තු කණ්ඩායමක්. හැබැයි මේ දේවල්ම වෙනස් විදිහකට ඉදිරිපත් කරමින් සංගීතය සපයන අපූරු වාද්‍ය වෘන්දයක් ගැන යුරෝපයෙන් වාර්තා වෙනවා. එළවළු පළතුරුවලින් සංගීත භාණ්ඩ හදාගත්තු ලෝකයේ පළමු එළවළු සංගීත කණ්ඩායම වන මෙයාලා ඉන්නේ ඔස්ට්‍රියාවේ වියානා නුවරයි. 

දැනට අවුරුදු විස්සක විතර කාලයක ඉඳන් ඔස්ට්‍රියාවේ වගේම ලෝකයේ වෙනත් නගරවලත් සංගීත සංදර්ශන පවත්වන මේ කණ්ඩායම හරිම ආඩම්බරයකින් යුතුව තමයි තමන්ගේ සංගීත කටයුතු සිදුකරන්නේ. 
කැරට් අලයක් අරන් මදය හාරලා හදාගත්තු බටනලාවක්, ලීක්ස් ගස් අතුල්ලමින් හදාගත්තු වයලීනයක්, ගර්කින් ගෙඩියකට තක්කාලි ගෙඩියක් අමුණලා හදපු නලාවක් වගේ ගොඩක් අපූරු නිර්මාණ මෙයාලා සතුයි. ප්‍රධාන බෙරය විදිහට පාවිච්චි කරන්නේ ලොකු වට්ටක්කා ගෙඩියක්. 

ඕන දෙයක සංගීතය අන්තර්ගතයි. ඒ නිසා ඕන දෙයක් තුළින් සංගීතය නිපදවාගන්නත් ඒක අත්විඳින්නත් අපිට පුළුවන්” මේ සංගීත කණ්ඩායමේ සාමාජිකාවක් වන බාබරා එහෙම කියනවා. 
මේ අයගේ විශේෂත්වය තමයි හැම සංදර්ශනයකදීම අලුත් දෙයක් ඉදිරිපත් කරන්න උත්සාහ ගැනීම. විටෙක එළවළුවකට තට්ටුකරලා සංගීතය නිපදවාගන්න මෙයාලා තවත් වෙලාවකදී එළවළුවක් පිහියකින් කැපෙන ශබ්දය පවා සංගීතයක් බවට හරවාගෙන තියෙනවා. 

අනික් කාරණය තමයි මෙයාලා මේ සංගීත උපකරණ හදාගන්නේ සංගීත ප්‍රසංගය දවසේ උදේ වරුවෙයි. ඒ නිසා උදෙන්ම මාකට් එකට ගිහින් එළවළු තෝරාගෙන ඇවිත් සංගීත භාණ්ඩ නිර්මාණය කරනවා. ඒ හැම අවස්ථාවකදීම අලුත් අත්හදාබැලීම් කරන්නත් එයාලා යොමුවෙන නිසා රසිකයින්ටත් ගොඩක් වෙලාවට අලුත් අලුත් දේවල් රසවිඳින්න ලැබෙනවා. ඒ විතරක් නෙමේ, මෙයාලා මිලදී ගන්න එළවළුවලින් සංගීත භාණ්ඩ නිර්මාණයට යොදා නොගෙන ඉතිරිවෙන එළවළුවලින් සුප් එකක් හදලා ප්‍රසංගය ඉවරවුණාම නරඹන්නන්ට පිළිගැන්වීමත් මෙයාලගේ සිරිතක්. 

මෙයාලගේ ආරම්භයත් ලොකු අහම්බයක්. මීට අවුරුදු විසිඑකකට කලින් මේ කණ්ඩායමේ ඉන්න පරණම සාමාජිකයන් තුන්දෙනාට විශ්වවිද්‍යාලයේ කලා උළෙලට යම්කිසි නිර්මාණාත්මක ඉදිරිපත් කිරීමක් කරන්න සිදුවෙලා. රෑ කෑමට සුප් එකක් හදමින් හිටිවෙලාවේ කලා උළෙලට කරන්නේ මොකක්ද කියලා මේ තුන්දෙනා කල්පනා කර කර ඉඳලා. එතකොට තමයි එළවළුවලින් සංගීත වාදනයක් ඉදිරිපත් කරන්න මෙයාලට හිතිලා තියෙන්නේ. ඒ ගත්තු පොඩි තීරණේත් එක්ක මෙයාලා අවුරුදු 20ක් එකදිගට සාර්ථකව ඉදිරියට ගිහින්. ලන්ඩනයේ, චීනයේ ෂැංහයි නුවර, යුක්රේනයේ වගේ ලොව විවිධ තැන්වල ප්‍රසංග පැවැත්වූ මේ එළවළු සංගීත කණ්ඩායමට ලෝකයේ ජනප්‍රිය පුද්ගලයින්ගේ ‍ෙපෟද්ගලික සාදවලට සංගීතය සපයන්නත් දැන් ආරාධනා එමටයිලු. 

බීබීසී ඇසුරෙනි.

Text - Suranga   /   Pic -  Internet