රුසියානු ලේඛක බොරිස් අකුනින්ටත් කොරෝනා
අකලට පොතක් පරිවර්තනය කරන මා වැනි පුද්ගලයෙකුට 2019 වසරේ ගොඩගේ සාහිත්‍ය උළෙලේ හොඳම පරිවර්තක සම්මානය හිමිවූයේ පැරණි සෝවියට් දේශය තුළ පමණක් පිටපත් මිලියන 130ක් අලෙවි වූ බොරිස් අකුනින්ගේ කොරනාත්සියා ඉලි පස්ලෙද්නිය් ඉස් රෝමානොෆ් කෘතිය සිංහලයට නැගීම වෙනුවෙනි. එබැවින් ඔහු මාගේ දිවියේ විශේෂ ස්ථානයක් උසුලයි.
රුසියාවේ ගසියෙතා. ඩොට් රූ පුවත්පත වාර්තා කළ පරිදි බොරිස් අකුනින් ද කොරෝනා ආසාදිත ප්‍රසිද්ධ පුද්ගලයින් අතරට එක් වී ඇත. මා හට වැදගත් ඔහු ආසාදනය වීම නොවේ. ව්ලදිමීර් පුටින්ගේ පාලනයට ගිනි අවි ඔසවා ප්‍රංශයේ හා එංගලන්තයේ වෙසෙන අකුනින් පැවසූ කොරෝනා ගැන බිය පහකරන ඔහුගේ වැදගත්ම පණිවිඩය නිසාය. ඒ කොරෝනා වයිරසයට වඩා එයට ඇති බිය බොහෝ සේ භයානක බවය. අපි රුසියාවේ හා රුසියානු බස කතාකරන රටවල සාහිත්‍ය ලෝකයේ තවත් පෙරළි කරන්නට ඔහුට ඉක්මනින් නිදුක් නිරෝගී සුව පතමු.
ලේඛක බොරිස් අකුනින් (සැබෑ නම ග්‍රිගෝරි චාර්තිෂ්විලි) ඒ ගැන සිය ෆේස්බුක් පිටුවේ සටහනක් තැබුවේය. ජේත්තුකාර රෝගයකින් පෙළෙන නිසා සමාජ ජාලය අතහැර දැමූ බව ඔහු සිය රසික රසිකාවියන්ට පැහැදිලි කළේය. “ටිකක් ශක්තිමත් වුණ විට මම අනිවාර්යයෙන්ම මගේ හැඟීම් බෙදාගන්නම්” ඔහු සහතික විය . “කොරෝනා වයිරසයට ඇති බිය කොරෝනා වයිරසයට වඩා කිහිප ගුණයක් බියකරුයි. ඔබ පරිස්සම් විය යුතුයි, නමුත් කලබල වීමට අවශ‍ය තාවයක් නැහැ, ඔහු අනතුරු ඇඟවීය. දැනට බොරිස් අකුනින් ජීවත්වන්නේ ලන්ඩනයේය.
විශේෂඥ වෛද්‍ය පුෂ්ප රන්ජන් විජේසිංහ