වර්ණභේදයට එරෙහිව ලොව පුරා විරෝධතා!
අමෙරිකාව ලෝකෙට පෙන්වා සිටි සිය සුපිරි ප්‍රජාතන්ත්‍රවාදයේ මුහුණුවර වෙනස්විය. කළු මිනිසෙකු වන ජෝර්ජ් ෆ්ලොයිඩ්ගේ ඝාතනයට එරෙහි විරෝධතාව ලොවපුරා ව්‍යාප්ත වන අයුරු දැන් දක්නට ලැබේ. මේ විරෝධය ධවල මන්දිරය අඳුරේ ගිල්ල විය. ට්‍රම්ප් පවුල භූගත බංකරයකට කොටු කළේය. අමෙරිකාවේ ප්‍රාන්ත 23ක නගර 45ක ඇඳිරිනීතිය ක්‍රියාත්මක කරවීය. එසේ වුවද මිනිස්කම ඉල්ලා නැඟුණු කළු විලාපය මේ වනවිට දේශසීමා තරණය කොට ලොවවටා පැතිර යමින් පවතී.
මේ වනවිට කළු සුදු භේදයකින් තොරව වැළ නොකැඩී වීදි බැස සිටින අමෙරිකන් ජනතාව නිදිවර්ජීතව නිවියෝර්ක් නුවරත් වොෂින්ටන් නුවරත් සෙසු ප්‍රාන්තවලත් විවිධ ස්වරයෙන් එකම හඬක් ඉදිරියට ගෙන යමින් සිටී.
ඒ හිතුවක්කාර පොලිස් නිලධරයෙක්ගේ උමතු ක්‍රියාවක් හේතූවෙන් ජිවිතය ඉල්ලා හඬ නැගූ කළු ජාතික ජෝර්ජ් ෆොයිඩ්ගේ අවසන් වදන් පෙළ වූ ‘මට හුස්ම ගන්න බැහැ...’ යන්නය. ජෝර්ජ් ෆොයිඩ්ගේ එම වදන් වැළෙන් මුවහත් වූ අමෙරිකානු පොදුජන විරෝධය දැන් ලොවපුරා සැබෑ ප්‍රජාතන්ත්‍රවාදී නිදහස් වාතාවරණයක් ඉල්ලමින් පෙරට යමින් සිටී.
මේ කළු ජාතිකයා මරණයට පත්වීමත් සමඟ එල්ල වූ විරෝධතා සමනය කිරීමට ට්‍රම්ප් අසමත් විය. අදාළ ඝාතනයෙන් පසුව ට්‍රම්ප් විසින් සිදුකරන ලද ඇතැම් ප්‍රකාශ හේතුවෙන් විරෝධතාකරුවෝ ට්‍රම්ප් පිළිබඳ දැඩි වෛරයකින් පසුවෙති. මේ අතර සාමකාමීව විරෝධතා දැක්වූවන්ට කඳුළු ගෑස් ප්‍රහාර එල්ලකළ බවටද ඇමරිකානු ජනාධිපතිවරයාට චෝදනා එල්ල වී තිබේ. අමෙරිකානු පාලනය විසිර යන ලෙස ජනතාවගෙන් ඉල්ලා සිටිද්දී විරෝධතාකරැවන් ඉල්ලන්නේ යුක්තියයි. දිනකිහිපයක් භූගතව සිට එළියට පැමිණි ට්‍රම්ප් තර්ජනය කර ඇත්තේ කළහකාරීන් පෙළපාලි අතහරින්නේ නැතිනම් සහ ප්‍රාන්ත ආණ්ඩුකාරවරැන් අවශ්‍ය ක්‍රියාමාර්ග ගැනීම ප්‍රතික්ෂේප කරන්නේ නම් තමන් ෆෙඩරල් හමුදා වැඩට බස්සවන බව කියමිනි.
එසේ වුවද සක්‍රීය රාජකාරියේ යෙදී සිටින හමුදා භටයින් උද්ඝෝෂණ පැවැත්වෙන නගරවලට ගෙන්වා ගැනීම සඳහා කැරලිකාර පනත ඉල්ලා සිටින ජනාධිපති ඩොනල්ඩ් ට්‍රම්ප්ගේ අදහසට ඇමෙරිකාවේ ආරක්ෂක ලේකම් මාක් එස්පර් විරැද්ධ වී තිබේ. මෙම පනත ක්‍රියාත්මක කරනු ලබන්නේ රට තුළ දරැණුම අවස්ථාවක් උද්ගත වූ අවස්ථාවකදී පමණකි.
මෙම කැරලිකාර පනත 1807 දී “ඉන්දියානුවන්ගේ සතුරැ ආක්‍රමණයන්ගෙන්” ආරක්ෂා වීමට මිලීෂියාවක් කැඳවීමට ජනාධිපතිවරයාට අවසර දීම සඳහා සම්මත කරන ලද්දකි. පසුව එය එක්සත් ජනපද මිලිටරිය දේශීය කැළඹීම්වලදී භාවිතා කිරීමට සහ සිවිල් අයිතිවාසිකම් ආරක්ෂා කිරීමට ඉඩදීම සඳහා දීර්ඝ කරන ලදී. කොන්ග්‍රස් පර් යේෂණ සේවා වාර්තා අනුව කැරලිකාර පනත The Insurrection Act දුසිම් ගණනක් වන අවස්ථාවලදී භාවිත කර ඇත. නමුත් දශක තුනකට ආසන්න කාලයක් තුළ එය භාවිත කර නැත. 1992 දී ලොස් ඇන්ජලීස් හි පැවති කැරලි කෝලාහලවලදී එය අවසන් වරට භාවිත කර ඇත. සිවිල් අයිතිවාසිකම් යුගය තුළ 1950 සහ 60 දශකය පුරා විවිධ ජනාධිපතිවරුන් තිදෙනෙකු විසින් මෙම නීතිය භාවිත කර තිබේ.
වරක් කළු ජාතිකයින් සහ සුදු ජාතිකයින් එකට අධ්‍යාපනය ලබන පාසලක විරෝධතාවක් පාලනය කිරීම සඳහා එක්සත් ජනපද හමුදා ආකැන්සාස් වෙත යැවීමට 1957දී මෙම නීතිය භාවිතා කළ විට ජනාධිපති ඩ්වයිට් අයිසන්හවර් ප්‍රබල මහජන විරෝධයකට මුහුණ දුන්නේය. 1960 දශකයේ අග භාගයේ සිට නීතිය භාවිත කිරීම දුර්ලභය. මිලිටරි ආධාර වඩාත් ඵලදායී කිරීමේ උත්සාහයක් ලෙස 2006 දී කත්‍රිනා සුළි කුණාටුවෙන් පසු කොංග්‍රසය එය සංශෝධනය කළ නමුත් ප්‍රාන්ත ආණ්ඩුකාරවරැන් ඊට විරෝධය දැක්වීමෙන් පසුව එම සංශෝධනයද අවලංගු කරන ලදී.
මෙම ඝාතනයට ලක්වූ ජෝර්ජ් ෆ්ලොයිඩ් නමැති කළු ජාතිකයා එම අවස්ථාවේ කොවිඩ් ආසාදනයට ලක්ව තිබූ බවට දැන් තහවුරු වී තිබේ. ඝාතන සිද්ධියට අත්අඩංගුවට ගෙන වැඩතහනමට ලක්කර සිටින පොලිස් නිලධාරීන් සිව්දෙනාට එරෙහිව මේ වනවිටද චෝදනා ගොනුකර තිබේ.
මේ අතර ජෝර්ජ් ෆ්ලොයිඩ් වෙනුවෙන් යුක්තිය ඉටු කරන්නැයි සිදුකෙරෙන සිවිල් උද්ඝෝෂණ රට තුළ පනවා ඇති ඇඳිරි නීතියද නොතකමින් තවදුරටත් ක්‍රියාත්මකයි. විරෝධතාකරුවන් මැන්හැටන්හි ජනප්‍රිය සංගීත කණ්ඩායමක් වන ‘බ්ලැක් අයිඩ් පීස්’ ගායක කණ්ඩයාමේ ගීතයක් ගයමින් ඉදිරියට ගියේය. එම ගීතයෙන් විමසන්නේ ආදරය කොහේද යනුවෙනි. නැගී එන විරෝධතා මැද ශාන්ත ලුසියා නගරයේ උකස් මධ්‍යස්ථානයක ආරක්ෂාවට සිටි පොලිස් නිලධාරියෙකු විරෝධතාකරැවන්ගේ වෙඩි පහරින් මියගියේය. ඔහුට අමෙරිකානු ජනාධිපති ඩොලන්ඩ් ට්‍රම්ප් අවසන් බුහුමන් දැක්වූ බවද වාර්තා විය. ප්‍රචණ්ඩත්වය කලකිරීම, අරගලය සහ නොසන්සුන්තාව ගොඩනැගෙමින් තිබෙන පරිසරයක අතිඋතුම් ශුද්ධෝත්තම ෆ්රැන්සිස් පාප්වහන්සේ ආදරය හා දයාව යොමුකළේය.
ඇමරිකාවේ නිව් ඕලින්ස්හි පොලිස් නිලධාරීන් දණ නමා සංකේතාත්මකව විරෝධතාකරුවන්ට සාමය ප්‍රකාශ කළ අතර ටෙනසී සහ අනෙකුත් නගරවල ඇමරිකානු ජාතික ආරක්ෂක භටයනුත් එලෙස දණ නමා තම සහෝදරත්වය විරෝධතාකරුවන්ට ප්‍රකාශ කළේය. මේ අතර මියගිය ෆ්ලොයිඩ්ගේ උපන් ගමෙහි සිටින සුදු ජාතිකයන් තම කළු අසල්වැසියන්ගෙන් සමාව ඇයද තිබේ.
ඔවුන් එලෙස සමාව අයදමින් සඳහන් කළේ වසර ගණනාවක් තිස්සේ පැවති ජාතිවාදයට සමාව දෙන ලෙසයි. හූස්ටන් වෙත රැස්වූ සුදු ජාතිකයන් ඔවුන්ගේ කළු අසල්වැසියන් ඉදිරිපිට දණගසා සමාව හා ප්‍රතිසන්ධානය ඉල්ලා යාඥා කිරීමේ නිහතමානී ක්‍රියාව නිසා බොහෝ දෙනෙක් කඳුළු සැලුවේය.
මේ අතර නි ව් යෝර්ක් නගරයේ ලෙනොක්ස් හිල් රෝහලේ කම්කරුවෝ ජෝර්ජ් ෆ්ලොයිඩ්ගේ විරෝධතාවන්ට සහයෝගය දැක්වීම සඳහා පිටත දණගසා සිය සහය ලබා දුන්නේය. හොවාර්ඩ් ප්‍රාන්ත පොලිස් ප්‍රධානියාද මේරිලන්ඩ් හි කොලොම්බියාවේ පැවති උද්ඝෝණයට එක්වූයේ “නිශ්ශබ්දතාවය ඊට අනුකූල වේ” යනුවෙන් ලකුණක් තබාගෙනයි.
පසුගිය 27 වැනිදා ඝාතනයට ලක් වූ ජෝර්ජ් ෆ්ලොයිඩ්ගේ 06 හැවරිදි දියණියගේ මව ඉතා සංවේදී මාධ්‍ය සාකච්ඡාවක් කැඳවමින් කියා සිටියේ ඔහු හොඳ මිනිසෙකු බවයි. ඇමරිකාවේ හිටපු උප ජනාධිපති ජෝ බියිඩන් ජනපති ට්‍රම්ප්ගේ ක්‍රියා කලාපය දැඩි විවේචනයට ලක්කළේය. කළු ජාතිකයින්ට අඩු සැලකිලි තිබූ අමෙරිකාවේ, දෛවෝපගත ලෙස ජනපති මන්දිරයට පිවිසි එරට පළමු කළු ජනාධිපතිවරයා වන බරක් ඔබාමාද සිකුරාදා විරෝධතාකරුවන් ආමන්ත්‍රණය කිරීමට කටයුතු කළේය. ඔහු පවසන්නේ මේ විරෝධතා ජනතාව අවදි කිරීමට සහ අමෙරිකාවේ වෙනසක් ඇතිකිරීමට අවස්ථාවක් කරගත යුතු බවයි.
මේ අතර ලොවපුරා මේ විරෝධය ඔඩුදුවා තිබුණි. 2016 දී ප්‍රංශ පොලීසිය විසින් ඝාතනය කළා යැයි කියන කළු ප්‍රංශ ජාතිකයෙකුට සාධාරණය ඉල්ලමින් පැරිස් නුවර විරෝධතා ව්‍යාපාරයක්ද පැවැත්විණ. ඕස්ට්‍රේලියාවේ සිඩ්නි නුවරද විරෝධතාවකට ජනගඟක් ගැලීය. පලස්තීන විරෝධතාකරුවන්, බෙත්ලෙහෙමේ ප්‍රධාන කිතුනු දේවස්ථානය ඉදිරිපිටට පැමිණ ඉල්ලා සිටියේ, කළු ජාතිකයන්ට සිදුවන මෙම අසාධාරණකම් හා පලස්තීන ජනතාවට ඊශ්‍රායල් හමුදා විසින් සිදුකරන අඩන්තේට්ටම් වහා නවත්වන ලෙස ඉල්ලමිනි. මෙලෙස ජෝර්ජ් ෆ්ලොයිඩ් ඝාතනයට ලක්වීමේ සිදුවීම පාදක කරගෙන වර්ණභේදවාදයට එරෙහිව ලොවපුරා රටවල් රැසක විරෝධතා ක්‍රියාත්මකව තිබුණි.