අල්ලස් දැලේ වැටුණු කොංග්‍රස් ලොක්කා
ඉන්දියාවේ කොංග්‍රස් පක්ෂයේ ජ්‍යෙෂ්ඨ සාමාජිකයකු වන හිටපු මුදල් අමාත්‍ය පලනියාප්පන් චිදම්බරම් අත්අඩංගුවට ගෙන තිබේ. ඒ, වංචා දූෂණ සහ මුදල් විශුද්ධිකරණ චෝදනා මතයි. මුදල් අමාත්‍යවරයාව සිටි සමයේ විදේශ ආයෝජකයින්ගෙන් අමෙරිකානු ඩොලර් මිලියන ගණනක අල්ලස් ලබාගැනීමේ චෝදනා මත චිදම්බරම්ට එරෙහිව විමර්ශන ක්‍රියාත්මක විය.
එහි ප්‍රතිඵලයක් ලෙස ඉන්දීය මධ්‍යම විමර්ශන කාර්යාංශ නිලධාරීන් ඔහු අත්අඩංගුවට ගත්තේ දිල්ලියේ පිහිටි ඔහුගේ නිවස ඉදිරිපිටදීයි. ඔහුගේ ආධාරකරුවන් සහ මාධ්‍යවේදීන් රැසක් එම අවස්ථාවේ අදාළ ස්ථානයට රැස්ව සිටියහ. අනතුරුව ප්‍රශ්න කිරීම් සඳහා ඔහු ඉන්දීය මධ්‍යම විමර්ශන කාර්යාංශය වෙත රුගෙන ගොස් තිබේ. කෙසේ වෙතත් 73 හැවිරිදි හිටපු ඉන්දීය මුදල් අමාත්‍ය පලනියාප්පන් චිදම්බරම් තමාට එරෙහි චෝදනා ප්‍රතික්ෂේප කර ඇත. ඔහු මීට පෙර ඉන්දියාවේ ස්වදේශ කටයුතු අමාත්‍යවරයා ලෙසද කටයුතු කර තිබේ.