2017 අප්‍රේල් 01 වන සෙනසුරාදා

කාස රෝගය මාරකයක් හැබැයි බේරෙන්නත් පුළුවන්

 2017 අප්‍රේල් 01 වන සෙනසුරාදා, පෙ.ව. 06:00 1517

කාසය හෙවත් ක්ෂය රෝගය දැන් බහුල ලෙස පැතිර යන රෝගයක්. වසරකට රෝගීන් 13757ක් වාර්තා වන බව සෞඛ්‍ය අංශ පෙන්වා දී තිබෙනවා. මේ රෝගය නිසි වෛද්‍ය ප්‍රතිකාර ගැනීමෙන් නිට්ටාවට සුවකරගත හැකි රෝගයක්. පසුගිය වසරේ වාර්තාගත රෝගීන් සංඛ්‍යාව 8886ක් දක්වා අඩුකරගන්නට අපට හැකි වී ඇත්තේ නිසි කලට ප්‍රතිකාර ලබාගන්නට යොමුවීම නිසයි. මේ සඳහා රෝග ලක්ෂණ පහළ වූ වහාම වෛද්‍ය ප්‍රතිකාර ලබා ගැනීම කළ යුතුයි.

ක්ෂය රෝගය කියන්නේ මොකක්ද?

• වාතය මගින් බෝවන රෝගයකි
• ක්ෂය රෝග කාරකය බැක්ටීරියාවකි
• පරම්පරාගත රෝගයක් නොවේ

ක්ෂය රෝගය බෝවන්නේ කොහොමද?

ප්‍රතිකාර නොගන්නා, පෙනහළු ආශ්‍රිත ක්ෂය රෝගය ඇති රෝගීන් කහින විට, කිවිසුම් හරින විට සිනාසෙන හා කතාකරන විට විෂබීජ සහිත සෙම බිඳිති වාතයට එකතුවේ. මෙම විෂබීජ ආශ්වාස කිරීමෙන් රෝගය ආසාදනය වේ. වැඩි වශයෙන් පෙනහළු ආශ්‍රිතව වැළඳේ. ශරීරයේ වෙනත් ඕනෑම ඉන්ද්‍රියක රෝගය ඇතිවිය හැකිය.

ක්ෂය රෝගයේ රෝග ලක්ෂණ

(මේ රෝග ලක්ෂණ ඇත්නම් වහාම ළඟම ඇති රෝහල් සායනය වෙත යන්න)

1. සති දෙකකට වැඩි කැස්ස

2. රාත්‍රී කාලයේ ඇතිවන මඳ උණ

3. ශරීරයේ බර අඩුවීම

4. රාත්‍රී කාලයේ අධික දහදිය දැමීම

5. කෑම අරුචිය

6. සෙම සමඟ රැධිරය පිටවිම

ඉහත සඳහන් රෝග ලක්ෂණ එකක් හෝ වැඩි ගණනක් ඇත්නම්, ළඟම පිහිටි ළය රෝග සායනයට/ සෙම පටල පරීක්ෂණාගාරයට පැමිණ නොමිලේ සෙම පටල පරීක්ෂාවක් කරගන්න. නිසි ප්‍රතිකාර දිනපතා මාස 6ක් ගැනීමෙන් ක්ෂය රෝගය සම්පූර්ණයෙන් සුව කළ හැක.

ප්‍රතිකාර පැහැර හැරීමෙන්,

• රෝගය සුව නොවේ.

• රෝගය බෝ කරන්නෙකු බවට පත්වේ.

• සුව කළ නොහැකි බහු ඖෂධ ප්‍රතිරෝධ ක්ෂය රෝගී තත්ත්වයට වුවද පත්විය හැක.

ශරීර ප්‍රතිශක්තිය දුර්වල වීම රෝගය වැළඳීම පහසු කරයි.

1. පාලනය නොවූ නිදන්ගත රෝග - දියවැඩියාව

2. එච්.අයි.වී./ඒඩ්ස් රෝග ආසාදනය

3. මත්ද්‍රව්‍ය, මත්පැන් හා දුම්වැටිවලට ඇබ්බැහිවීම

4. මන්දපෝෂණය

5. අවයව බද්ධ කිරීම වැනි දිගුකාලීන ස්ටීරෝයිඩ ප්‍රතිකාර ලබාගන්නා අවස්ථා

6. කුඩා ළදරුවන් හා වයස්ගත වූවන්

රෝගය පැතිර යාම වළක්වා ගැනීමට...

• සැක සහිත රෝග ලක්ෂණ සහිත නම් වෛද්‍යවරයකු වෙත / ළය රෝග සායනයට හෝ සෙම පටල පරීක්ෂණාගාරයකට ගොස් පරීක්ෂා කර ගන්න / යොමුවන්න.

• ඔබ හඳුනාගත් ක්ෂය රෝගියෙකු නම් නිසි පරිදි දිනපතා නොකඩවා මාස හයක් ප්‍රතිකාර ගන්න.

• ප්‍රතිකාර අතපසු නොකරන්න. පැහැර නොහරින්න, අතරමඟ නතර නොකරන්න.

• කහින විට, කිවිසුම් යනවිට ලේන්සුවකින් මුව ආවරණය කරගන්න.

• තැන තැන කෙළ ගැසීමෙන් වළකින්න.

• මත්ද්‍රව්‍ය, මත්පැන් හා දුම්වැටි භාවිතයෙන් වළකින්න.

• දියවැඩියාව, ඇදුම වැනි කල් පවතින රෝග තත්ත්ව ප්‍රතිකාර මගින් නිසි පරිදි පාලනය කරගන්න.

• ක්ෂය රෝගය පිළිබඳව අන් අය දැනුවත් කරන්න.

• ක්ෂය රෝගීන් කොන් නොකිරීමට හා ඔවුන්ට නිසියාකාරව ප්‍රතිකාර ගැනීමට සහාය වන්න.

වැඩිදුර විස්තර දැනගන්නට මෙතැනට කතා කරන්න.

ක්ෂය රෝග මර්දන හා ළය රෝග පිළිබඳ ජාතික වැඩසටහන 
අංක 555/5, ඇල්විටිගල මාවත, නාරාහේන්පිට, කොළඹ 05
0112-368386