2019 මාර්තු 30 වන සෙනසුරාදා

සැහැල්ලු දිවියකට මඟ මෙන්න

 2019 මාර්තු 30 වන සෙනසුරාදා, ප.ව. 12:30 784

ලිහිලන ව්‍යායාම

ලිහිලන ව්‍යායාම තුළින් ශරීරයේ විඩාව stress අඩුවේ. පමණට වඩා වැඩි ක්‍රියාකාරීත්වය නිසා ඇතිවන ඵලයක් තුලනය කිරීමට හෝ විසඳීමට මෙම ලිහිලනය උපකාරී වන බව සොයාගෙන ඇත. පෙරදිග සහ අපරදිග අධ්‍යාත්මික සංස්කෘතියට අදාළ අය ලිහිලන ප්‍රතිකාර ලබා ඇත. ජෛව පසුපෝෂී යාන්ත්‍රණයට අනුව ඔලුවෙ කැක්කුම, බෙල්ලෙ කැක්කුම, අධික රුධිර පීඩනය, කාංසාමය තත්ත්ව අඩුකිරීමට මෙම ලිහිලන ප්‍රතිකාරය ප්‍රාථමික ආරම්භයකි. පර්යේෂණවලට අනුව ලිහිලන ප්‍රතිකාර මගින් ලැබෙන කායික ක්‍රියාකාරීත්වයන් පහත සඳහන් ලෙස උද්දීපනය වේ.

  • ස්නායු සම්ප්‍රේෂණවල නිෂ්පාදනය වැඩිදියුණු වීම.
  • මොළයේ අඩු සංඛ්‍යාතයන් ක්‍රියා කරන තරංගවල යොමුවීම. (ඇල්ෆා සහ බීටා)
  • රුධිර කේශනාළිකා විස්තාරණය (පළල් වීම) නිසා මතුපිට උණුසුමක් ඇතිවේ.

සිහිකල්පනාවේ ගැඹුරු තත්ත්වයට පත්වීමක් සිදුවේ. මේ සඳහා දිගුකාලීන පුහුණුවක් අවශ්‍ය වේ. හුස්ම ගැනීම තුළින් මෙය සිදුවේ.

ලිහිලන ව්‍යායාම සඳහා උපදෙස්

01. සුවපහසු ඉරියව්වක වාඩිවෙන්න. හොඳින් ඔබේ ඉරියව්ව ගැන අවබෝධයෙන් සිටින්න. කකුල් දෙක කතිරයක් ලෙස තබාගැනීම හෝ සුවපහසු පුටුවක පැහැදිලිව පාද පොළව මත තබා ඔබගේ කොන්ද ප්‍රදේශයේ පුටු ඇන්දෙහි හේත්තු වන ලෙස සිටින්න.

02. ඇස් වහන්න.

03. ඔබගේ අවධානය හුස්ම ගැනීම කෙරෙහි යොමු කරන්න. හුස්ම බඩට යන තෙක් ගැඹුරට හුස්ම ගන්න. පසුව හුස්ම පිටකිරීම හෙමින් සිදුකරන්න. මෙය වරක් නැවත නැවත කරන්න. එසේ කර ඔබේ ශරීරයට දැනෙන සංවේදනය විඳගන්න.

04. දැන් ගැඹුරට හුස්මගෙන හිස්කබලේ මාංශපේෂි, මුහුණ, ගෙල ප්‍රදේශයේ පේශි තද කරන්න. ඔබට පුළුවන් තරම් තද කරන්න. තද කරගෙන 7 දක්වා ගණන් කරන්න. ඉන්පසු හුස්ම පිටකර ඔබගේ පේශි ලිහිල් කරන්න. එසේ කර නැවත 7 තෙක් ගණන් කර ඉන්න. මෙයද 7 වරක් කරන්න.

05. දැන් නැවත ගැඹුරු හුස්මක් ගෙන උරහිස් බාහු, අත්වල පේශි තද කරන්න. එම ඉරියව්වෙහි 7 දක්වා ගණන් කරන්න. එතෙක් තදකර සිටින්න. පසුව හුස්ම පිටකර එම පේශි ලිහිල් කරන්න. ලිහිල් කර එම ලිහිල් අවස්ථාවේ 7 දක්වා ගණන් කර ටික වේලාවක් සිටින්න. මෙයද නැවත නැවත 7 වරක් කරන්න.

06. නැවත හුස්මක් ගෙන ඔබගේ පපුව උදර ප්‍රදේශයේ පේශි තද කරන්න. තදකර 7 වන තෙක් ගණන් කරන්න. පසුව හුස්ම පිටකරන්න. පිටකර 7 දක්වා ගණන් කරන්න. ලිහිල් කර ටික වේලාවක් ඉන්න. නැවත නැවත 7 වරක් කරන්න.

07. ගැඹුරැ හුස්මක් ගෙන උකුල කලවා හා පාදයේ පේශීන් තද කරන්න. 7 දක්වා ගණන් කරන තෙක් තදකර තබාගන්න. ලිහිල් වන්න. ලිහිල් වී 7 දක්වා ගණන් කරන්න. පසුව එය 7 වරක් කරන්න.

08. නැවත ගැඹුරු හුස්මක් ගෙන එකවිට ඔබේ ශරීරයටම තදකර 7 වන තෙක් ගණන් කරන තෙක් හුස්ම පිටකරන්න. 7 දක්වා ගණන් කරන්න. ලිහිල් වන්න. නැවත මෙය 7 වරක් කරන්න.

09. දැන් ඔබට තද ගතියක් හෝ පීඩනයක් දැනෙන්නේද යන්න බලන්න. ව්‍යායාම කිරීමට පෙර ඔබට තද ගතියක් දැනුණු තැන්වලට අවධානය යොමු කරන්න. දැන් එම ප්‍රදේශ ලිහිල් ද, නැත්නම් තද ගතියක් දැනේද යන්න බලන්න. තද ගතියක් දැනේ නම් තද ගතිය සහිත ප්‍රදේශයට විශේෂ අවධානයක් යොමුකර මෙම ව්‍යායාමය මුල සිට කරන්න.

10. දැන් කෙසේද ඔබට දැනෙන්නේ. ලිහිල් බවක් ඔබට දැනේද? ලිහිලන ව්‍යායාම ඉතාමත් සරලයි. මෙයට අවශ්‍ය වන්නේ පුරුදු පුහුණු වීමයි. මුල් අවස්ථාවේදී මෙම උපදෙස් අනුව කරන විට දුෂ්කර විය හැකිය. පසුව පුරුදු වීමෙන් මෙය පහසු විය හැකිය.

ඔබට තවදුරටත් යම් දුෂ්කර උපදෙස් හඬ පටයක් මගින් භාවිත කරන්න. ඉක්මන් වීමෙන් වළකින්න. හොඳින් කාලය අරගෙන මෙය හොඳින් කරගෙන යන්න. එසේම ව්‍යායාමය මුනින් අතට වැතිර සිටීමෙන්ද කළ හැකිය.

ලිහිලනය

ලිහිලනය අභ්‍යාස සඳහා උපකාරක රීති

01. වාඩිවෙන්න. නැත්නම් වැතිරෙන්න. වැතිරේ නම් සුවපහසු තැනක වැතිරෙන්න. නැතිනම් පහසු කෝණයක වාඩිවෙන්න. හොඳින් ශරීරය දරාගැනීම වැදගත් වේ. වැතිර සිටින විට තවත් උපකාර අවශ්‍ය නම් දණිස් පහසුවෙන් තබාගන්න. පුටුවක වාඩිවී ඇතිවිට ඔලුව තබාගත නොහැකි නම් අත්දෙක ඔලුවේ පිටුපසින් තබා හේත්තු වන්න. අපහසුවෙන් සිටින විට ශරීරයේ කොතැන හෝ පීඩනයක් ඇතිවේ. එය ලිහිලනයට බාධාවකි.

02. සැහැල්ලු බුරුල් ඇඳුම් අඳින්න. ඒ අනුව ඇඳුම් සකස් කරන්න. කණ්නාඩි ඉවත් කිරීම, තද ආභරණ ඉවත් කිරීම වැදගත් වේ.

03. සාමකාමී නිස්කලංක පරිසරයක් තෝරාගත යුතුය. උත්තේජකාරක අවම විය යුතුය හා තරමක් අඳුරු ස්ථානයක් තෝරාගත යුතුය. ව්‍යායාම කරන අතරතුර ඔබගේ සංවේදන හා මානසික ක්‍රියාවන් කෙරෙහි අවධානයෙන් පසුවීම වැදගත් වේ. ශබ්ද, විදුලි එළි, ගඳ සුවඳ විවිධ චලන මෙහිදී ඉවත් කළ යුතුය. දුරකතනයද ඉවත් කළ යුතුය.

04. ක්‍රියාකාරීත්වයෙන් තොරව සිටිය යුතුය. අමතර සංවේදන මැවීමට උත්සාහ නොවිය යුතුය. ලිහිල් වීම පිණිස ශරීරයට අමතර බලයක් ද නොයෙදිය යුතුය.

05. ඒ සඳහා අවශ්‍ය කාලය යොදවන්න. ආරම්භයේදී මෙම ව්‍යායාම කරන්න බොහෝ වේලා ගන්න පුළුවන්. නමුත් දිගින් දිගට මෙය කිරීමෙන් අඩු කාලයකින් මෙය කළ හැකිය.

06. නිතිපතා ලිහිලනය සඳහා නිශ්චිත කාලයක් යොදවන්න. මෙම ලිහිලනය පහසුවෙන් කරන්න පුළුවන් වෙන්නේ එකම වෙලාවක කරන විටදීය. ඔබ සමහර විට වැඩකර මහන්සි වූ විට හෝ ඇඳට යාමට පෙර කරන්න ඔබ කැමති විය හැකිය. දිනකට දෙවරක් කිරීම හොඳ ආරම්භයකි.

ලිහිලන අභ්‍යාස ගැන ඉතිරි කොටස එන සතියේ

 

⇔ කිරිබත්ගොඩ මූලික රෝහලේ
මනෝ වෛද්‍ය විශේෂඥ

නයනානන්ද කුමාරනායක

 2024 මාර්තු 02 වන සෙනසුරාදා, ප.ව. 02:00
 2024 මාර්තු 23 වන සෙනසුරාදා, ප.ව. 02:00