විශ්වකර්ම ඔසුව එප්සම් ලුණු
මොනවාද මේ එප්සම් සෝල්ට්?
එප්සම් සෝල්ට් හැටියට හඳුන්වන්නේ මැග්නීසියම් සල්ෆේට් කියන රසායනයයි. මේවා සාමාන්‍ය උෂ්ණත්වයේදී ලුණු කැට මෙන් දක්නට පුළුවන් සංයෝගයකි. එංගලන්තයේ සරේ ප්‍රාන්තයේ ඇති එප්සම් නමැති ලවණ අඩංගු විලේ නමට අනුව තමා මේ නම ලබාදී තිබෙන්නේ.
එප්සම්වල ප්‍රයෝජන
එප්සම් ලුණු ඔබට හිතාගන්නටත් බැරිතරම් සෞඛ්‍යමය ප්‍රතිලාභ රැසක් අත්කර දෙනවා. මේවා තුළ අඩංගු මැග්නීසියම් සහ සල්ෆේට් අයන සම තුළින් පහසුවෙන් ශරීරගත වෙලා ඉක්මණින් කටයුතු කරනවා. ශරීරගත වේදනා කැක්කුම්, ඉදිමුම්, වගේම වණ ලප කැළැල් සුව කරන්නට එප්සම්වලට හැකියි. හන්දි වේදනා සුවකරනවා වගේම දියවැඩියාව අධිරුධිර පීඩනය වගේ රෝගාබාධත් අවම කරන්නට එයට හැකියි.
ශරීරය විවේකී බවට පත්කර මානසික පීඩනය ආතතිය වළක්වා විවේකය ලබා දෙන්නත් මේ විශ්වකර්ම ලුණුවලට බලය තිබෙනවා. ශරීරයේ අන්තර්ගත එන්සයිම 325ක ක්‍රියාකාරීත්වය ඉහළ නංවන්නටත් එයට හැකියි. සල්ෆේට් මගින් පෝෂ්‍ය ද්‍රව්‍ය උරා ගැනීම ඉහළ දමන අතර ශරීරය තුළ ඇති විස ඉවත් කිරීමද සිදුකරයි. මි‍ෙග්‍ර්න් වැනි හිසරද සුවකිරීමටද මේ අපූරු ලවණයට හැකියාවක් තිබේ.
එප්සම් නාන බාල්දිය
එප්සම් ලුණු එක්කරන ලද මද උණුසුම් වතුර සහිත නාන බාල්දියක බැස සිටීමෙන් ශරීරගත සියලු වේදනා කැක්කුම් දුරු කරගත හැකි අතර මානසික ආතතිය අවපීඩනය වැනි තත්ත්වයන්ද මගහැරී යයි. ශරීරයේ රුධිර ධාවනය නිසි මට්ටමට ගෙන අවුත් හෝර්මෝන ක්‍රියාකාරීත්වය යථා තත්ත්වයට ගෙන එමින් නව ජීවයකින් යුතුව වැඩකටයුතුවල යෙදීමට අවස්ථාව සැලසේ.
උණු ජලයේ දියකළ එප්සම්වලට කළ හැකි දේ
• ශරීරය විවේකී බවට පත් කරයි.
• හන්දිපත්, මාංශ පේශි වේදනා සමනය කරයි.
• කෙණ්ඩා පෙරැළීම ඇතුළු මස්පිඬු පෙරැළීම් නවතා දමයි.
• රුධිර නාලගත ඉදිමුම් වළකා ඒවායේ ඇදෙන සුළු බව රැකදී හොඳ රුධිර සැපැයුමක් ඇති කරයි.
• මැග්නීසියම් හා සල්ෆේට් මගින් ඉන්සියුලින් නිපදවීම සහ භාවිතයට ගැනීමේ හැකියාව වර්ධනය කරයි. එමගින් දියවැඩියාව සමනය කරයි.
• සිරුරේ ඉදිමුම් තැලුම්, වණ දද සුව කරයි. සිරුරේ ඇණුනු කටු ඉවත් කිරීම පහසු කරයි. මියගිය සෛල ඉවත්කර තරුණ පෙනුමක් ලබාදෙයි.
• පාදවල හටගන්නා කැක්කුම් වේදනා සමනය කරන්නට දිව ඔසුවකි.
• ලප කැළැල් නැති සඳවන් මුහුණක් ලබාදෙන හොඳ පිරිසුදු කාරකයකි.
• මුහුණ පමණක් නොවේ ගෙදර දොර භාජන, ටයිල් ආදියද හොඳින් පිරිසුදු කරදෙයි.
• ගෙවත්තේ වගාවන්ට සරුසාර පොහොරක් ලෙසත් වැදගත්ය.
• නිය ආශ්‍රිගතව ඇතිවන දිලීර ආසාදන වළක්වයි.
♦ සුගත්